धनुषा, ०७६ माघ ९ गते ।
४ जना राष्ट्रिय सभा सदस्यहरुको लागि जनकपुरस्थित महेन्द्रनारायण निधी सांस्कृतिक भवनमा भई रहेको मतदानको क्रममा गठबन्धनले आ आफनो मतदातालाई कडा निगरानी गर्दै आएका छन् ।
मतदानको क्रममा मत क्रस हुने सम्भावना देखेपछि गठबन्धनका नेताहरुले आ आफना मतदाताहरुलाई दुई दिन अगाडी नै एकै ठाउँमा जम्मा गरेर प्रशिक्षण दिनुको साथै नमुना मतदान समेत गरेका छन् ।
बिहीवारदेखि जनकपुरधाम स्थित मारवाडी सेवा समितिमा समाजवादी पार्टी, होटल सीता पैलेसमा कांग्रेस, महोत्तरीको बर्दिबास स्थित होटल विनायक र पावन मिथिला राजपा नेपाल तथा होटल सैलुनमा नेकपाले आ आफ्ना पार्टीका मतदातालाई आफनो गठबन्धनका उम्मेदवारहरुलाई मतदान गर्न कडा निर्देशन दिदै होटलबाट बाहिर निस्कन तथा मोवाइलमा समेत अरुसंग कुराकानी गर्न समेत प्रतिवन्ध गराइएको हो ।
‘क्रसभोटिङ’ गर्ने हल्ला चलेपछि विपक्षी उमेदवारले भेट्न नपाउने गरी बासको व्यवस्था गरिएका नेकपा–राजपा गठबन्धनका मतदाताहरुलाई सोझै मतदानस्थलमा ल्याउने गरिएको छ ।
नेकपा र राजपाको गठबन्धनले आफनो पक्षमा १ सय ९४ मत र नेपाली काग्रेस र समाजवादीको गठबन्धनमा १८४ मतदाता देखिएको छ । दुवै गठबन्धनले आफुहरुले चुनाव जित्ने दावि गर्दै आएका छन् ।
निर्वाचन स्थलमा भेटिएका नेकपाका नेता समेत रहेको शहिदनगर नगरपालिकाका मेयर उदय कुमार बरवरियाले आफुहरुले चुनाव जित्ने निश्चित रहेको बताउनुभएको छ । उहाँले भन्नुभयो हामीले प्रशिक्षणदेखि नमुना मतदान समेत गरेका छौं, नमुना मतदानको क्रममा समेत १ सय ९४ मत नेकपा र राजपा गठबन्धनको पक्षमा परेकाले गर्दा आजको चुनावमा समेत नेकपा र राजपा गठबन्धनका उम्मेदवारहरुको जित सुनिश्चित रहेको बताउनुभयो ।
क्रस मतदान हुन नदिनका लागि गठबन्धनले २ जना जाँदा फरक फरक पार्टीका मतदातालाई मतदान केन्द्रमा पठाउने गरेको छ । दुवै गठबन्धनले आफना मतदाताहरुलाई मतदान नगरुञ्जेलसम्म अरुसंग कुराकानी र भेटघाट तथा बोल्न समेत नहुने गरि भित्री रुपमा निर्देशन जारी गरेको छ ।
यो विषयमा आफ्नो प्रतिक्रिया दिनुहोस् !