आवतजावत रोक्न सिमा नाकामा बाँसले घेरियो

महोत्तरी, ०७७ जेठ १ गते ।

महोत्तरीको मटिहानी नगरपालिकाले भारतसँग जोडिएको आफ्नो डेढ किमि सीमाक्षेत्र बाँसको घेरा हालेको छ । भारतबाट कोरोना संक्रमित भित्र्न नदिन र सीमा अतिक्रमण रोक्न बाँसको तीन तहको घेरा हालिएको छ ।

सशस्त्र प्रहरीको सहयोगमा गरिबनाथ मन्दिरदेखि जलेश्वर नगरपालिका छुने पर्सा गाउँसम्म बाँसको घेरा हालिएको मेयर हरिप्रसाद मण्डलले जानकारी दिए ।
नगरले एक साता लगाएर करिब २ लाख रुपैयाँ खर्चमा २ हजार ५ सयवटा बाँस गाडेको छ । मटिहानीको भारतसँग जोडिएको सीमामा दुवैतिर घना बस्ती छ । बिहारको मधुवनी जिल्लाको मधवापुर बजार नजिकै छ । त्यो सीमावारिका नेपालीको पायक पर्ने बजार हो ।

‘कोरोना भाइरसको संक्रमणबाट आफ्नो पालिकालाई सुरक्षित राख्न सीमामा बाँसको घेराबार लगाएका हौं,’ मेयर मण्डलले भने, ‘बोर्डरमा लगाइएको घेराबार तत्कालका लागि कोरोना संक्रमणबाट जोगिन कै लागि हो । आवश्यकता देखिए पछिसम्म राख्न सकिन्छ ।’

बार लगाउन सशस्त्र प्रहरीले पनि श्रमदान गरेको उनले जानकारी दिए । मण्डलका अनुसार बिहीबार पनि जलेश्वरको पर्सा गाउँ नजिकको सीमामा बार लगाउने काम भइरहेको छ । ‘शुक्रबारसम्म सीमामा घेराबार लगाउने काम सकिन्छ,’ मेयर मण्डलले भने, ‘यसले धेरै हदसम्म घुसपैठ रोकिन्छ ।’
महोत्तरीको विपद् व्यवस्थापन समितिले ‘आवश्यक परे सीमामा बाँसको घेराबार लगाउन सकिने’ निर्णय गरेपछि सशस्त्र प्रहरीले स्थानीय तहलाई यसका लागि पत्राचार गरिरहेको छ । सशस्त्र प्रहरी महोत्तरीका प्रमुख एसपी नीरकृष्ण अधिकारीका अनुसार सीमामा तीन तहको बाँसको घेरा हालिएपछि आउजाउ नियन्त्रण भएको छ । ‘मटिहानीको सीमासँग भारतीय बजार जोडिएको छ,’ उनले भने, ‘त्यसैले बाँसको घेरा हालिएको छ । त्यो नाघेर आउन सम्भव छैन ।’

महोत्तरीसँग भारतको ३८.६ किलोमिटर सीमा पर्छ । सीमा सिल गरेपछि सशस्त्रले जिल्लाका ४० ठाउँबाट निगरानी गरिरहेको छ । ‘सीमामा बाँसको घेराबार लगाउन महोत्तरीका अन्य पालिकालाई पनि पत्राचार गरिएको छ,’ एसपी अधिकारीले भने, ‘केही पालिकाले चासो देखाएका छन् । त्यहाँ पनि छिट्टै काम सुरु हुन्छ ।’