०७६ मंसिर २७ गते ।
भारत विहार राज्यको सितामढीबाट मङ्सिर २६ गते १० नेपाली बालकको उद्धार गरिएको छ । सामाजिक अभियन्ता सरोज राय र कुलदिप साहको नेतृत्वमा भारतमा बाल मजदुरी गराउन लगिएको बालकलाई उद्धार गरिएको हो । उद्धार गरिएको बालकमध्ये ७ जनालाई बालमजदुरी गराउन दलालले भारतको पंजाव, हरियाणालगायतको ठाँउमा तस्करी गर्न लान थालिएको थियो । ३ जना वालकलाई विरगंजबाट चोरी गरि भारतमा भिख मगाउने कार्यमा लगाइएको थियो । बाल मजदुरीमा लान लागेको बालकहरुको उमेर १४ देखि १७ वर्ष रहेका छन् सामाजिक अभियन्ता कुलदिप साहले जानकारी दिएका छ । विरगंजबाट चोरी गरिएका बालकहरुको उमेर ७ देखि ८ वर्ष रहेको छ ।
उद्धार गरिएका बालकहरु सर्लाही चन्द्रनगर गापाका विवेक माझी, विक्रम माझी, रवि कुमार, संतोष माझी, संदीप माझी , रूपेश माझी र राजु माझी रहेका छन् । एक महिना अगाडी भारतको विभिन्न शहरमा राम्रो तलबमा काम लगाई दिने लोभ दिएर लग्दै गर्दा नेपाल भारतको सिमावर्ती क्षेत्र सोनवरसा सिमामा दलाललाई पक्राउ गरि सातै बालकलाई बालगृह सितामढीमा राखिएको थियो ।
विरगंजको घण्टाघरबाट चोरेर भारत लगेका ७, ८ वर्ष उमेरका ३ जना बालकहरु सलार्हीको लालबन्दि न.पा.२ को बिर्बल पासवान, रामनगर न.पा. ६ को मो.सदरे आलाम नदाफ र बिरगंज घर बताउने किशन पटेल रहेका छन् । घण्टाघरमा खेल्दै गर्दा घुमाई दिने भन्दै तीनै जना बालकलाई ललाई फकाई रक्सौल लगेर चार दिनसम्म भिख माग्ने कार्यमा लगाइएको थियो । विरगंजबाट सितामढीको बाटो हुंदै अन्यत्र लान खोज्दा भारतीय प्रहरीले एक पुरुष र दुई महिला चोरलाई समेत पक्राउ गरि बालकलाई बालगृहमा राखेका थिए ।
भारतीय कानुनी प्रक्रिया निकै कडा भएकाले गर्दा जनकपुरका सामाजिक अभियन्ता कुलदिप साहले प्रदेश २ का आन्तरिक मामिला तथा कानुन मन्त्री ज्ञानेन्द्र यादव र सर्लाही जिल्लाको सिडियोको सिफारिस पत्र सहित कानुनी प्रक्रिया पूरा गरी झण्डै १ महिनापछि विहिवार उद्धार गरेको बताएका छन् ।
उद्धार गरिएका बालकहरुलाई सलार्हीको चन्द्रनगर गाउँपालिका २ का वडा अध्यक्ष रामनारायण महतो र वडा नं. ६ का वडा अध्यक्ष रामचन्द्र कापड तथा स्थानीय संचारकर्मीहरुको रहोवरमा आठ बालकलाई अभिभावकको जिम्मा लगाइएको छ । उद्धार गरिएका सदरे आलम र किशन पटेलको अभिभावकलाई भेटेर जिम्मा लगाउने भन्दै तत्काल मलंगवा स्थित महिला शान्ति सेवा केन्द्रमा राखिएको सामाजिक अभियन्ता कुलदिप साहले बताएका छन् ।
