रंजन भण्डारी
महोत्तरी, पुस ३ गते : महोत्तरी जिल्लाको औरही नगरपालिकाले आफ्नो पालिका मातहतका सवै १६ विद्यालयमा तत्काल तीन दिनको लागि विदा दिएको छ । शितलहरले तापक्रम वर्षकै न्युन रहेको र बालवालिकालाई विद्यालय आउन गाह्रो भएपछि नगरपालिकाले तत्काल विदा घोषणा गरेको हो ।
औरहीका मेयर सुनिलकुमार यादवले हाललाई तीन दिनका लागि विदा घोषणा गरिएपनि आगामी तीन दिनमा मौसममा सुधार नआए विदा बढाउन पनि सकिने बताए । मेयर यादवले स्थानीय विद्यालयको अनुगमन समेत गर्दै बालवालिका विद्यालय आउन मौसम प्रतिकुल देखेर तत्काल विद्यालय बन्द गर्न पत्राचार गरेका थिए ।
बालविकासमा मेट्रेस र कार्पेट
यता मेयर यादवले बालविकासका कक्षामा बस्ने बालवालिका अत्यन्त साना हुने गरेकाले उनीहरुलाई न्यानो बनाएर राख्न पालिकाका सबै विद्यालयहरुमा मेट्रेस र कार्पेटको व्यवस्था गरेका छन् । हाललाई सवै विद्यालयमा मेट्रेस पठाइसकिएको र विद्यालय खुल्नु अगावै न्यानो हुने कार्पेट समेत पठाउने व्यवस्था भइरहेको बताए ।
शितलहरले जनजीवन कष्टकर
यता जिल्लाका अन्य भेगमा समेत शितलहरले अत्यधिक प्रभाव पारेको छ । विपन्न वर्ग अत्यधिक प्रभावित भएकोमा जिल्ला विपद व्यवस्थापन समितिले सबै पालिकाहरुलाई आ आफ्नो तर्फबाट शितलहर प्रभावितहरुलाई सक्दो सबै प्रकारको न्यानोको व्यवस्था गर्न पत्राचार गरेको छ । जिल्ला प्रहरी कार्यालयले समेत आफ्नो मातहतका चौकीहरुलाई सक्दो सहयोग गर्न निर्देशन दिएकोमा औरही नगरपालिका स्थित प्रहरी चौकीले स्थानिय स्तरमा दाउरा जुटाएर नगरपालिकाको समेत सहयोगमा ठाउँठाउँमा बाँडेको थियो ।
राहत नपाएको शितलहर प्रभावितको गुनासो
जिल्लाका सबै भागमा शितलहरले प्रभाव पारेको बेला अधिकांश पालिकाका स्थानीले कुनै निकायको सहयोग नआएको गुनासो गरेका छन् । उनीहरुले कुनै जनप्रतिनिधीहरु अझै हेर्न समेत नआएको भन्दै दुखेसो पोखे । शितलहरले बालवालिका, वृद्ध तथा दैनिक ज्याला मजदुरी गर्ने, गरिब तथा विपन्न वस्तीका वासिन्दाहरु अत्यधिक प्रभावित भएका छन् ।
यता प्रदेशसभा सदस्य सुरीता साहले आफुसँग केहि थान कम्वल रहेको र थपको लागि प्रयास गरिरहेको बताउदै आफ्नो क्षेत्रका शितलहर प्रभावितहरुलाई थोरै भएपनि राहत पुर्याउने प्रयासमा रहेको बताएकी छन् ।
