अजय शाह | २०७६ पौष ११ शुक्रबार
तराई-मधेसको जनजीवन शीतलहरले प्रभावित भएकाे छ। बढ्दो चिसो र शीतलहरका कारण विपन्न समुदायका मानिसहरु बढी मारमा परेका छन्।
प्रदेश दुईका जिल्लाका अधिकांश ठाउँका शीतलहरले जनजीवन प्रभावित भएकाे हाे। बिहान र बेलुका चल्ने चिसो हावा, बाक्लो हुस्सु र शितलहरले जनजीवन कष्टकर बनेकाे हाे।
सडक पेटी, रेलवे स्टेशन तथा विभिन्न धर्मशालामा रात बिताउनेको दैनिकी कष्टकर बनेकाे छ। चिसोको मारमा सबैभन्दा बढी बालबालिका र ज्येष्ठ नागरिक परेका छन्।
चिसो बढेपछि मुख्य बजारहरु पनि बिहान र बेलुका सुनसान छन्। जनकपुरधाममा व्यवसायी अशोक गुप्ताले भने, ‘जाडो चहलपहल कम भएपछि कारोबार पनि घटेको छ।
चिसोका कारण अधिकांश विद्यालय बन्द गरिएका छन्। चिसो बढेपछि व्यापार व्यवसाय पनि प्रभावित भएको क्षीरेश्वरनाथ उद्योग वाणिज्य संघ महेन्द्रनगरका अध्यक्ष सुरेश यादवले बताए।
धनुषा, महोत्तरीसहित मध्य तथा पूर्वी तराईका जिल्लाहरुमा बाक्लो हुस्सु लागेको छ। अझै केही दिन हुस्सु लाग्ने र चिसो बढ्ने सम्भावना रहेको मौसमविद् बताउँछन्।
चिसोसँगै अस्पतालमा निमोनिया, रुघाखोकी, घाँटी दुख्नेजस्ता रोगका बिरामी उपचारका लागि आउने गरेका छन्। हाडजोर्नी, रुघाखोकी र दमका बिरामीको संख्या बढेको प्रादेशिक अस्पतालका डा. नागेन्द्र यादवले बताए।
बिपन्न बढी प्रभावित
शीतलहर चलेपछि स्थानीय प्रशासनले दाउरा वितरण गरेकाे छ। चोक–चोकमा आगो बाल्ने व्यवस्था मिलाइएको हाे। तर, ग्रामिण क्षेत्र र देहातका दलित तथा गरीब परिवार बढी प्रभावित छन्।
जिल्ला प्रशासन कार्यालय धनुषाले शीतलहर पूर्वतयारी तथा प्रतिकार योजना २०७६ लागू गरेको छ। जिल्लाका १८ वटै स्थानीय तहलाई लक्षित गरी सुरु गरिएको उक्त योजना अन्तर्गत विपन्न समुदायलाई कम्तीमा एक थान न्यानो लुगा वितरण गर्ने र आगो बालेर धुनी लगाउने व्यवस्था गर्न सूचना जारी गरिएकाे छ। चिसोका कारण बिरामी बढ्न सक्ने भएकाले स्वास्थ्य संस्थालाई सतर्क रहन निर्देशन पनि दिइएको प्रमुख जिल्ला अधिकारी प्रदीपराज कँडेलले बताए।
प्रशासनले वितरण गरेकाे सामग्री पर्याप्त नभएकाे प्रभावितकाे गुनासाे छ। प्रभावितहरु अहिले राहतको पर्खाइमा छन्। रेडक्रस सोसाइटी धनुषाका सभापति नरेशप्रसाद सिंहले जाडोले जनजीवन प्रभावित भएकाले चिसोबाट बच्ने उपायबारे पहिलो चरणमा जनचेतनामूलक कार्यक्रम सञ्चालन गरिएको बताए।
हवाई सेवा प्रभावित
शितलहरसँगै लागेको बाक्लो हुस्सुका कारण काठमाडौं–जनकपुर हवाई सेवासमेत प्रभावित भएको छ। कुहिरो लाग्न थालेपछि पटकपटक काठमाडौं–जनकपुरको उडान रद्द हुँदै आएको छ। जनकपुर विमानस्थल कार्यालयका अनुसार विमान अवतरण र उडानका लागि आवश्यक ‘भिजिविलिटी’ नपुगेपछि बुधबार सम्पूर्ण उडान रद्द गरिएको थियाे।
यो विषयमा आफ्नो प्रतिक्रिया दिनुहोस् !