धनुषा,०७६ चैत्र ३ गते ।
अवैध रुपमा उत्पादन गरि बेचविखन गर्दै आएका घरेलु मदिरा सेवनले धनुषामा २० भन्दा बढी व्यक्तिहरुको एक हप्तामै मृत्यु घटनाले धनुषामा सनसनी मचिएको छ । अवैध रुपमा गाउँघरमै उत्पादन गरिदै आएको रक्सी सेवनले मान्छेहरुको मृत्यु भई रहेको पुष्टि भएसंगै नेपाल प्रहरीको आँखा वर्षौदेखि कमिसन खाएर जोगाउँदै आएको घरेलु मदिरा उत्पादन गर्ने भट्टीहरुमा परेका छन् । नेपाल सरकारको गृहमन्त्रालय, स्वास्थ्य मन्त्रालयदेखि प्रदेश सरकार र जिल्ला प्रशासनको पहलमा अहिले धनुषाको विभिन्न क्षेत्रमा अवैध मदिरा भट्टीहरुको खोजी गरिदै रातारात भट्टीहरु भत्काइदै छ । अवैध रुपमा उत्पादन गरिएका रक्सी नष्ट गरिदै आएको छ ।
धनुषाको बटेश्वर गाउँपालिकाका विभिन्न वाडा, मिथिला नगरपालिकाको हरिपुर मालटोल, मिथिला विहारी नपाको तारापटर्टी सिरसिया, क्षिरेश्वरनाथ नपाको रमदैयालगायतको टोलमा अवैध रक्सी उत्पादन गर्ने भट्टीहरु नै संचालनमा रहेका छन् । वर्षौैदेखि व्यवसायिक रुपमा उत्पादन गरिदै आएको त्यस्ता भट्टीहरुबाट स्थानिय प्रहरी प्रशासनदेखि जिल्ला तहका प्रहरी र प्रशासनले मासिक रुपमै लेवी बुझदै आएका छन् ।
जनकपुरकै स साना तथा ठुल ठुला पसलहरुमा समेत अवैध लोकल दारु बेचिने गरेको छ । नाम नखोल्ने शर्तमा पिडारीचौकका एक होटल संचालकले भने हामीलाई तारापटटी सिरसियाबाट रक्सी ल्याइ दिने गरेका छन् । जनकपुरको चारैतिर लोकल दारु बेच्ने गरेको छ । यो सवै प्रहरी प्रशासनकै सेटिगमा जनकपुरमा अवैध मदिरा आउने गरेको छ । पसलबाट समेत महिनाको ५ सयदेखि २ हजारको दरले स्थानिय प्रहरीले रकम असुली गर्दै आएका छन् । महिनावारी नदिएको खण्डमा प्रहरी होटलमा आएर टर्चर गर्ने गरेकाले हामीले मासिक नै दिने गरेको बताए ।
घटना नहुञ्जेलसम्म प्रहरी प्रशासनकै मिलोमतोमा मोलजोल हुने गरेको अवैध कारोवारको जव पर्दाफास हुन्छ तव प्रहरी एक्सनमा आएजस्तो केही समयका लागि अभियान नै चलाउँछन् त्यसपछि विस्तारै घटना सेलाउँदै जान्छन् तव पुनः तस्कर र अवैध कारोवारीहरुको कारोवार विस्तार हुदै जाने गरेको छ ।
