धनुषा,०७९ पुस २८ गते ।नेपाली काग्रेस मधेश प्रदेशका सांसद पूर्व संसदीय दलका नेता रामसरोज यादवले मधेश प्रदेश सरकारलाई काग्रेसले सदनमा समर्थन गर्न सक्ने सम्भावना रहेको खुलासा गर्नुभएको छ । जानकी टेलिभिजनको जानकी संवाद कार्यक्रममा सांसद यादवले प्रतिनिधीसभामा वर्तमान सत्ता गठबन्धनलाई नेपाली काग्रेसले समर्थन गरेकाले मधेश प्रदेशका समेत काग्रेसले समर्थन गर्न सक्ने सम्भावना रहेको बताउनुभयो ।
उहाँले मधेश प्रदेश सरकारलाई समर्थन गर्ने वा विपक्षमा बस्नेबारे अन्तिम निर्णय संसदीय दलको बैठकबाट गरिने बताउनुभयो । उहाँले आफनो व्यक्तिगत धारणा भने सरकारको विपक्षमा मतदान गर्ने धारणा राख्नुभयो । मधेश प्रदेशको मुख्यमन्त्रिमा ६३ जना सांसदको समर्थनमा पुस २७ गते जनता समाजवादी पार्टी मधेश प्रदेशका संसदीय दलका नेता सरोज कुमार यादव नियुक्त हुनुभएको छ ।
प्रदेश प्रमुख हरिशंकर मिश्रले संविधानको धारा १६८ को उपधारा २ बमोजिम उहाँलाई ६३ सांसदले समर्थन गरेको आधारमा मुख्यमन्त्रिमा नियुक्त गर्नुभएको हो । नवनियुक्त मुख्यमन्त्री सरोज कुमार यादवलाई पुस २९ गते मधेश प्रदेश सरकारको मधेश भवनमा विहान साढे ११ बजे पद तथा गोपनियताको सपथ खुवाउने कार्यक्रम रहेको छ । सोही समयमा सत्ता समर्थन दलहरुबाट समेत मन्त्रीहरु नियुक्त गर्ने गरि सपथ ग्रहण गराउने तयारीमा जसपा, एमाले, माओवादी, जनमत पार्टीलगायतको सत्ता साझेदार दलहरु आन्तरिक तयारीमा जुटेका छन् ।
