सुन्दर शान्त नेपालको अढाई वर्षको सिकाई आदान प्रदान सम्पन्न

धनुषा, ०७६ माघ २८ गते ।
संघियता सवलीकरणको लागि अल्पसंख्यक तथा विपन्न समुदायहरुको हकअधिकारको लागि धनुषामा संचालित सुन्दर शान्त नेपाल परियोजनाले माघ २८ गते सरोकारवालाहरुसंग सिकाई आदान प्रदान गरेको छ । स्पोर्ट नेपालको आयोजनामा संचालित सुन्दर शान्त नेपाल परियोजना धनुषाको जनकपुरधाम उपमहानगरपालिका र बटेश्वर गाउँपालिकामा काम गर्दै आएको छ ।
२०७४ साल मंसिर २८ गतेबाट संचालित परियोजनाले आफनो अढाई वर्षको क्रममा गरेका कामहरुको समिक्षा गरेका छन् । परियोजनाअन्तर्गत गठित नागरिक सहकार्य मंच जनकपुरका अध्यक्ष प्रदिप यादवको अध्यक्षता तथा जिल्ला समन्वय समिती धनुषाका प्रमुख रामदेव वनरैत यादवको प्रमुख आतिथ्यमा आयोजित सिकाई आदान प्रदान कार्यक्रममा परियोजना संयोजक मनोज सिंह दनुवारले अढाई वर्षमा गरेको प्रगति र उपलब्धिबारेमा प्रस्तुतीकरण गर्नुभयो ।
कार्यक्रममा जिल्ला समन्वय समिती प्रमुख यादवले सुन्दर शान्त नेपाल परियोजनाले सिमान्तकृत वर्गको साथै विपन्न वर्गको उत्थान गर्न पहल गरेकाले यस परियोजनाको अवधि अझै बढाउनुपर्नेमा जोड दिनुभएको छ । प्रमुख यादवले संघियताको नौलो अभ्यासको सवलीकरण गर्न तथा अल्पसंख्यक र विपन्न वर्गको उत्थानको लागि परियोजनाले गर्नुपर्ने धेरै कामहरु अहिले पनि अधुरा रहेकाले गर्दा अझै केही समय परियोजनाका गतिविधी थप गरियोस् भन्ने धारणा व्यक्त गर्नुभएको छ ।

जनकपुरधाम उपमहानगरपालिका ७ का वडाअध्यक्ष जानकीशरण साहले सुन्दर शान्त नेपाल परियोजनाले शिक्षाको क्षेत्रमा समेत आफनो गतिविधीहरु गर्दै आएकोमा यसले विद्यार्थीहरुमा राम्रो प्रभाव पार्ने समयमै परियोजनाको गतिविधी सम्पन्न हुन लागेकाले गर्दा आउने दिनमा यो परियोजनाको समयावधि थपिएर यो अभियानको क्रममा भएका कमी कमजोरी र सिकाईलाई लागु गर्न आग्रह गर्नुभएको छ ।
जनकपुरधाम उपमहानगरपालिका २० का वडाध्यक्ष भोगेन्द्र झाले यस परियोजनाले शिक्षा, युवाहरु र विपन्न, दलित वर्गहरुको उत्थानका लागि पटक पटक जनचेतनामुलक कार्यक्रम गर्दै आएकोमा यस्ता गतिविधीहरुलाई अझै सशक्त तरिकाले अगाडी बढाउनु हुन आग्रह गर्नुभएको छ ।
जनकपुरधाम उपमहानगरपालिका १० का वडाअध्यक्ष मिथिलेशलाल कर्णले सुन्दर शान्त नेपाल परियोजनाले गर्दा नागरिकहरुमा जनचेतनामा विकास भएको छ । यस परियोजनाबाट तालिम पाएका, गोष्ठिमा सहभागि भएका र अन्य ठाउँमा स्थलगत अध्ययन र अनुगमन गर्दा राम्रो प्रतिफल हासिल गरेकाले गर्दा पनि यो परियोजनाको निरन्तरताको लागि आग्रह गर्नुभएको छ ।
राष्ट्रिय मानवअधिकार आयोगका अधिकृत मनमाया मगर, थर्ड एलाइन्सका प्रदेश संयोजक विनोद महरा, समाजसेवी मुन्नी देवी दास, रंगिला महरा, समाजसेवी देवसागर दासलगायतका व्यक्तिहरुले सुन्दर शान्त परियोजनाले दुई पालिकामा सराहनीय कामको सुरुवात गरेकाले गर्दा प्रतिफल देखिने वेलामा परियोजनाको गतिविधी समाप्त हुन गई रहेकाले गर्दा पुनः परियोजनाको सुरुवात भएको खण्डमा अढाई वर्षमा गरिएको लगानीको प्रतिफल देखिने बताउनुभएको थियो ।
दिपेन्द्रप्रसाद सिंह