काठमाडौ : राष्ट्रिय सरसफाइ तथा स्वच्छता समन्वय समितिले प्रदेश स्तरीय खानेपानी, सरसफाइ तथा स्वच्छता समन्वय समितिसँग समन्वय गरी हरेक प्रदेशमा पूर्ण सरसफाइ सम्बन्धी कार्यशाला आयोजना गर्ने भएको छ । पूर्ण सरसफाइ मार्गदर्शनको पुनरावलोकनका बिषयमा केन्द्रमा भएका छलफललाई प्रदेश स्तरका सरोकारवालाहरुसँग व्यापक छलफल गर्न हरेक प्रदेशमा कार्यशाला गर्न लागेको हो । तर त्यो भन्दा अगाडि हरेक प्रदेशमा प्रदेश स्तरीय खानेपानी, सरसफाइ तथा स्वच्छता समन्वय समिति गठन गर्नुपर्नेछ । आगामी एक महिना भित्र पिवाससीसी गठन गरी कार्यशाला आयोजना गरिसक्ने सम्बन्धित प्रदेशका सामाजिक विकास मन्त्रालय तथा भौतिक पूर्वाधार मन्त्रालयले प्रतिबद्धता जनाएका छन् । अहिलेसम्म प्रदेश ५ मा मात्रै भौतिक पूर्वाधार मन्त्रालयको सचिवको अध्यक्षतामा पिवाससीसी गठन गरी प्रदेशभरिका १०९ वटै स्थानीय तहको वास प्लान बनाउने काममा स्थानीय तहसँग समन्वय गरिरहेको छ । प्रदेश ५ ले प्रमुख सचिवलाई संरक्षकमा राखेको छ ।
प्रदेश तहमा आयोजना हुने कार्यशालामा सम्बन्धित प्रदेशका सबै स्थानीय तहका प्रमुखहरु, शिक्षा, स्वास्थ्य, सामाजिक विकास महाशाखाका प्रमुख र प्रदेश तथा स्थानीय तहमा कार्यरत गैरसरकारी संस्थाका प्रमुख तथा प्रनिनिधी सहभागी हुनेछन् । कार्यशालामा पूर्ण सरसफाइ सम्बन्धी राष्ट्रिय कार्यशालामा भएका छलफल उपर बृहत छलफल एवं परामर्श लिईनेछ । प्रदेश तथा स्थानीय तहका सवालहरुलाई समेत समावेश गर्नका लागि स्थानीय तहका प्रमुख तथा प्रदेशका मुख्य व्यक्तिहरुलाई सहभागी गराउन लागिएको हो ।
प्रदेशमा आएका छलफलहरुलाई अन्तिम रुप प्रदान गर्न केन्द्रमा वास विज्ञहरुसँग, नीति निर्माता एवं सम्बन्धित उच्च अधिकारीहरु सम्मिलित परामर्श बैठक आयोजना हुनेछ । त्यसपछि पूर्ण सरसफाइ निर्देशिकाको मस्यौदा निर्माण हुने खानेपानी तथा ढल व्यवस्थापन विभागका समाजशास्त्री भोजेन्द्र अर्यालले जानकारी दिनुभयो ।
पूर्ण सरसफाइ मार्गदर्शन २०७३ ले समेट्न नसकेको बिषयमा भएको राष्ट्रिय कार्यशालामा व्यापक छलफल गरिएको छ । कार्यशालामा पूर्ण सरसफाइका सूचकहरु के के हुने ? पूर्ण सरसफाइ कार्यक्रम सञ्चालन गर्दा अपनाउनुपर्ने प्रक्रिया, कार्यप्रणाली र चरण एवं पूर्ण सरसफाइ अभियानमा तीन तहको सरकारको भूमिका र बहु सरोकारवाला पक्षको बिषयमा छलफल भएको छ । राष्ट्रिय सरसफाइ तथा स्वच्छता समन्वय समितिले आयोजना गरेको पूर्ण सरसफाइ सम्बन्धी राष्ट्रिय कार्यशालाको उदघाटन खानेपानी सचिव माधव बेल्बासेले गर्नुभयो ।
यो विषयमा आफ्नो प्रतिक्रिया दिनुहोस् !