धनुषा, ०७६ चैत १६ गते ।
जिल्ला प्रशासन कार्यालय धनुषाको आदेशमा हिन्दु धर्मालम्बीको आस्थाका केन्द्र जानकी मन्दिरको पट सर्वसाधारणका लागि तत्काल बन्द गरिएको छ । कोरोनाका संक्रमण बढ्न सक्ने खतरालाई ध्यानमा राख्दै मन्दिरमा भीड हुन नदिनका लागि मन्दिरको पट सर्वसाधारणका लागि बन्द गरिएको मंदिरका महन्थ रामतपेश्वर दास वैेष्णवले बताएका छन् ।
मन्दिरमा प्रत्येक दिन बिहान बेलुका पूजा भई रहेको भएपनि सर्वसाधारणका लागि जानकी मन्दिरको पट इतिहासमै पहिलो पटक बन्द गरिएको महन्थ दासले बताए ।सन् १९११मा स्थापना गरिएको जानकी मन्दिरको १ सय ९ वर्षको इतिहासमा पहिलो पटक सर्वसाधारणका लागि बन्द गरिएको हो ।
भगवान रामको जन्मोत्सव रामनवमीको ५ दिन मात्रै बाँकी रहेको समयमा मन्दिर बन्द हुनुले रामनवमी मेला समेत प्रभावित हुने भएको छ । रामनवमीको अवसरमा जनकपुरधामको राम मन्दिर र जानकी मन्दिरमा विशेष पूजा अर्चना हुने गरिएको छ । तर यस पटक कारोना भाइरसको त्रासका कारण रामनवमी समेत प्रभावित हुने भएको छ । लक डाउनका कारण जानकी मंदिरलगायतका मठमंदिरमा आउने श्रद्धालुहरुको समेत कमी छ ।
कोरोना भाइरसका संक्रमणको कारण रामनवमीको अवसरमा मन्दिरमा विशेष पूजा हुने भनिए पनि कुनै पनि औपचारिक कार्यक्रम नराखिएको उत्तराधिकारी मंदिर स्रोतले जनाएको छ ।
