धनुषा, वैशाख २४ गते ।
विश्वव्यापी रुपमा फैलिदै गएको कोरोना भाइरस कोभिड–१९ को संक्रमण नेपालमा फैलिन नदिनका लागि नेपाल सरकारले चैत ११ गतेदेखि जारी गरेको लकडाउनका कारण प्रभावित भएका धनुषाको बटेश्वर गाउँपालिकाका २५ सय घरपरिवारलाई आफन्त नेपालले राहत प्रदान गर्ने कार्यको सुरुवात गरेको छ ।
फिडा इन्टरनेशनलमार्फत आफन्त नेपालले १७ लाख बटेश्वर गाउँपालिकाको लागि राहत सामाग्री खरिद गर्न गाउँपालिकालाई प्रदान गरेको छ । गाउँपालिकाले ५ लाख थप गरि २२ लाख बरावरको राहत सामाग्री बैशाख २४ गतेदेखि बटेश्वर गाउँपालिकाको वडा नं. ४ बाट वितरण कार्यको सुरुवात गरिएको छ ।
पूर्वमन्त्रि समेत रहनुभएका प्रदेश सांसद शत्रुधन महतोले बटेश्वर गाउँपालिकाको वडा नं. ३ बाट राहत वितरण कार्यको शुभारम्भ गर्नुभएको छ । राहत सामाग्रीमा १० किलो चामल, दाल १ किलो, नुन १ किलो, आधा लिटर खाने तेल र एउटा साबुन वितरण थालिएको सहयोगी संस्था आफन्त नेपाल धनुषाका कार्यकारी निर्देशक जयप्रकाश यादवले बताउनुभयो ।
राहत वितरण कार्यक्रममा बटेश्वर गाउँपालिका अध्यक्ष डम्बरबहादुर राउत, उपाध्यक्ष प्रमिला देवी सिंह, वडा नम्बर ३ का अध्यक्ष हिरालाल महतो, आफन्त नेपालका उपाध्यक्ष प्रदिप यादव मोरबैता, आफन्त नेपालका कार्यकारी निर्देशक जयप्रकाश मण्डल, आफन्त नेपालका कार्यक्रम संयोजक विष्णुकुमार यादव, आफन्त नेपालका कर्मचारी मुकेश भगत, विभिन्न पार्टीका प्रतिनिधिको जनप्रतिनिधीहरुको सहभागिता रहेको थियो ।
