काठमाण्डौं, ०७७ जेठ ४ गते ।
पूर्व प्रहरी महानिरिक्षक सर्वेन्द्र खनाल तथा सत्तारुढ दलका दुई सांसद महेश बस्नेत र किसान श्रेष्ठले महोत्तरीबाट समाजवादी पार्टीका सांसद डा. सुरेन्द्र यादवलाई काठमाडौं ल्याएको घटनालाई ‘अपहरण’ भन्न नमिल्ने प्रहरीले निश्कर्ष निकालेको छ ।
महानगरिय प्रहरी परिसर काठमाडौंले सरकारी वकिलको कार्यालयमा बुझाएको प्रतिवेदनमा उक्त जाहेरीमाथि अनुसन्धान हुँदा अपहरण तथा शरिर बन्धकको कसुर पुष्टि नहुने भएकाले मुद्दा चलाउन नपर्ने राय उल्लेख रहेको स्रोतले बताएको छ । ‘हामीकहाँ आज प्रतिवेदन आइपुगेको छ, त्यसलाई सर्वप्रथम अध्ययन गर्नुपर्छ, अनि मात्रै के हुन्छ भन्न सकिन्छ,’ सरकारी वकिलको कार्यालय काठमाडौंका प्रमुख हरि रेग्मीले बताए । ‘अध्ययन गर्न बढीमा १ देखि २ दिन लाग्ने छ । उनले फाईल अध्ययन नभइसकेको भन्दै प्रहरी प्रतिवेदनमा के छ भन्ने कुरा आफूलाई थाहा नभएको बताए ।
सहन्यायाधीवक्ता रेग्मीको भनाईमा, प्रहरी प्रतिवेदनमा अनुसन्धान गर्नुपर्ने कुनै पाटो छुटेको रहेछ भने सरकारी वकिलले थप निर्देशन दिएर प्रतिवेदन ल्याउन आदेश गर्न सक्नेछ । प्रतिवेदनमा चित्त बुझाएमा त्यसैअनुसार निर्णय गर्नसमेत सक्नेछ ।
मुद्दा चल्ने निर्णय भएमा जाहेरीमा नाम किटिएकाहरु पक्राउ पर्ने अवस्था हुन्थ्यो । मुद्दा नचल्ने निर्णय भएमा भने तह तह हुँदै महान्यायाधीवक्ताले जिल्लाको निर्णय सदर गर्नुपर्छ ।
स्रोतका अनुसार, प्रतिवेदनमा समाजवादी दलका सांसद डा. सुरेन्द्र यादवलाई महोत्तरीबाट उठाएर काठमाडौं ल्याएको नभई उनी राजीखुसी आएको देखिएकाले अपहरणको आरोप पुष्टि नहुने उल्लेख छ ।
महानगरिय प्रहरी परिसर काठमाडौंले पनि सरकारी वकिलको कार्यालयमा बुझाएको प्रतिवेदनबारे कुनै सार्वजनिक टिप्पणी गरेको छैन ।
