धनुषा, ०७७ जेठ १९ गते ।
६ जनाको ज्यान जाने गरि पश्चिम रुकुममा भएको नरसंहार र रूपन्देहीमा भएको मानवता विरोधी घटनाका दोषीलाई कारवाहीको माग गर्दै धनुषाका दलित अगुवाहरुले विरोध प्रदर्शन गरेका छन् । घटनाका पीडितहरुलाइ न्याय र दोषीलाई कडा भन्दा कडा कारवाहीको माग गर्दै गणेशमान चारनाथ नगरपालिकाका दलित अगुवाहरुले कालोपट्टी बाँधी प्रदर्शन गरेका छन्् ।
दलित जागरण अभियान अध्यक्ष उर्मिला पासवानका अध्यक्षतामा अधिकारकर्मी तथा अगुवाहरुले सयौंको संख्यामा विरोध प्रदर्शन गरेका छन् । रयालीमा जातीय विभेद अन्त्य गर, दोषीलाई फाँसी दे, पीडितलाई न्याय दे लगायतका नारा लेखिएको प्लेकार्ड सहित नगर परिक्रमा गरिएको थियो । नगर परिक्रमा पश्चात् आयोजित कोणसभा दलित अगुवाहरूले दोषीलाई कारवाही र पीडितलाई न्यायको लागि जोडदार रूपमा माग गरेका थिए ।
कोणसभामा मानवाधिकारकर्मी विनोद महराले यो घटनाले जातीय विभेदको चरम पराकाष्ठा नाघेकोले यस अन्यायमा परेकालाई न्याय र दोषीलाई कडा भन्दा कडा कारवाहीको माग गरे । उनले विभेद अन्त्यको लागि कानुनहरु भएपनि राज्यले कार्यान्वयन तर्फ उदासीन रहेको आरोप लगाए । घटनामा संलग्न जो कोही दोषी भएपनि सत्यतथ्य छानबिन गरि रुपन्देही र पश्चिम रुकुम दुबै घटनाका दोषीलाई कडा भन्दा कडा कारवाहीको माग राखे ।
लित अधिकारकर्मी चन्देश्वर दासले दोषीलाई कारवाहीको माग गर्दै अब दलितहरु पनि सशक्त हुनुपर्ने बताए । त्यस्तै अधिकारकर्मी चन्देश्वर सदाले दलितहरु हिन्दु धर्मकै कारण विभेदमा परेको गुनासो गरे । हिन्दु धर्म दलितहरुलाइ शोषण दमन गर्नकै लागि कानुनी दस्तावेजको रूपमा तयार पारिएको बताए ।
रयालीमा सहभागी अन्य बक्ताहरू, तलक परियार, समाज सेवी जोगिन्दर महरा, समाजवादीका नेता जोगिन्दर राम, कृष्णकुमारी तमांग समेत दोषीलाई कडा भन्दा कडा सजायको माग गरेका थिए । केही दिन अगाडी अन्तरजातीय विवाह गर्न खोज्दा पश्चिम रुकुममा ६ जना दलित युवाहरूको हत्या भएको थियो ।
त्यस्तै रुपन्देहीमा १२ वर्षीया बालिका अंगिरा पासीलाइ बलात्कार गरिएको थियो । बलात्कार पछि वडाध्यक्षकै रोहवरमा उक्त बालिकाको बलात्कारी सँगै जबर्जस्ती बिहे गराइएको थियो र बिहेको भोलिपल्टै बालिकाको शंकास्पद तरिकाले झुन्डिएको अव्यवस्थामा शव फेला परेको थियो ।
त्यस्तै केही दिन अगाडी सिरहाको कल्याणपुरमा यौन प्रस्ताव नमानेपछि एक दलित महिला माथि नगरपालिका कार्यालयकै अगाडी लछारपछार गर्दै कुटपिट गरिएको थियो । कार्यक्रमको संचालन सोती पासवानले गरेका थिए ।
