धनुषा, ०७७ जेठ २५ गते ।
सर्लाहीको सदरमुकाम मलङ्गवामा एम्बुलेन्सबाट प्रहरीले लागुऔषधसहित ओसारपोसारमा सलग्न आरोपमा तीनजनालाई पक्राउ गरेको छ । जिल्ला प्रहरी कार्यालय सर्लाहीका प्रहरी निरीक्षक राजु प्रसाद कुर्मीको कमाण्डमा खटिएको प्रहरी टोलीले शनिबार पक्राउ गर्दै आइतवार सार्वजानिक गरेको छ ।
एम्बुलेन्समा ८ किलो लागुऔषध चरेस मलङ्गवा नगरपालिका–८, झिलमिलियामाई मन्दिरबाट लिएर जाँदै गर्दा पक्राउ गरेको प्रदेश प्रहरीको कार्यालय जनकपुरले जनाएको छ ।
चरेस ओसारपसारमा सलग्न आरोपमा मलङ्गवा नगरपालिका–८, झिलमिलियामाइ बस्ने ३७ वर्षीय राम दुलार राय, एम्बुलेन्सका चालक मलङ्गवा नगरपालिका–३ बस्ने २८ वर्षीय मोहन राय यादव र सहयोगी मलङ्गवा नगरपालिका–४ बस्ने नथुनी ठाकुरलाई प्रहरीले पक्राउ गरेको छ ।
ज १ च १४०७ नंं. को एम्बुलेन्स ‘मुस्लिम युथ हेल्प कमिटी’ मलङ्गवा–६ को नाममा रहेको छ । एम्बुलेन्स चालक मोहन राय यादवले अन्यत्रबाट एम्बुलेन्समै हालेर ८ किलो चरेस ल्याएको र भारततर्फ पुर्याइदिन आफुलाई रामदुलार रायले जिम्मा लगाएको बताएका छन् ।
घटनाबारे थप अनुसन्धान जारी रहेको जिल्ला प्रहरी कार्यालय सर्लाहीका प्रहरी नायब उपरीक्षक मदन कुँवरले जानकारी दिएका छन् ।
