सलार्ही,०७८ पुस २३ गते । सर्लाहीको बरहथवा नगरपालिका–१०, कटानीमा शुक्रबार उखुबारीभित्र शंकास्पद अवस्थामा एक महिलाको शव फेला परेको छ ।
सो वडाका सुरत रामकी श्रीमती अन्दाजी ३२ वर्षीया सावित्री देवी राम कटानीस्थित बरहथवा नगरपालिका–७, बस्ने राम छबिला साहको उखुबारी भित्र मृत अवस्थामा फेला परेको सर्लाही प्रहरीका प्रवक्ता डीएसपी माधव प्रसाद बुढाथोकीले उज्यालो अभियानलाई जानकारी दिए । उनले घटना शंकास्पद देखिएकाले अनुसन्धान अघि बढाइएको बताएका छन् ।
मृतक महिलाको शरीरका विभिन्न भाग जलेको अवस्थामा पाइएको प्रत्यक्षदर्शीले बताएका छन् । यस्तै, मृतक महिलाको शरीरमा कुनै पनि कपडा समेत नरहेको पाइएको घटनास्थलमा पुगेका बरहथवा नगरपालिका वडा नं. १० का कार्यवाहक वडाध्यक्ष रामदिनेश महतोले जनाए ।
मृतक महिलाको शव पोष्टमार्टमका लागि शुक्रबार दिउँसो जिल्ला अस्पताल मलंगवा लगिएको छ । शुक्रबार बिहान उखुबारी भित्र महिलाको शव देखेपछि स्थानीयवासीले प्रहरीमा खबर गरेका थिए ।
परिवारका अनुसार मृतक महिला अंग्रेजी नयाँ वर्षको दिन गएको पुस १७ गते शनिबारदेखि नै घरबाट बेपत्ता भएकी थिईन् । मृतक महिलाका श्रीमान सुरत माझी हाल वैदेशिक रोजगारीको शिलशिलामा कतारमा रहेका बुझिएको छ ।
