काठमाडौं । महानगरीय प्रहरी कार्यालय रानीपोखरी (मेट्रो) ले आन्तरिक शुद्धीकरणका लागि ‘पर्फर्मेन्स अडिट टिम’ गठन गरेको छ । प्रहरी नियमावली ०७१ मा टेकेर मेट्रोमा कार्यरत एसपी रेवती ढकालको नेतृत्वमा विशेष टिम गठन गरिएको हो । टोलीमा ५ जना रहनेछन् ।
रानीपोखरीका डीआईजी विश्वराज पोखरेलले प्रहरीकै आन्तरिक कमजोरी, राम्रा नराम्रा पक्षको अनुगमन, गल्ती गर्नेलाई कारबाही गर्नका लागि ‘पर्फर्मेन्स अडिट टिम’ गठन गरेको बताएका छन् ।
यसअघि उनले रानीपोखरीमा कार्यरत सादा पोशाकका घुमुवा प्रहरी खारेज गरेका थिए । रानीपोखरीले गठन गरेको टोलीको कार्यक्षेत्र उपत्यकाका तीन जिल्लाका सम्पूर्ण प्रहरी कार्यालय हुनेछन् । टोलीले अनुगमनसँगै गल्ती गरेको देखिए प्रहरीलाई नै पक्राउ गन सक्नेछ ।
महानगरीय प्रहरी कार्यालय रानीपोखरीका एसएसपी श्याम ज्ञवालीले भने,‘‘यो प्रहरीलाई व्यावसायिकप्रति अझ बढी जिम्मेवार बनाउन चालिएको कदम हो । यो टोलीले सिपाहीदेखि एसएसपीसम्मलाई पक्राउ र कारवाही गर्न सक्छ ।’’
‘पर्फर्मेन्स अडिट टिम’ले प्रहरी सेवा प्रवाहको मूल्याङ्कन, अपराध अनुसन्धानको मूल्याङ्कन, साधन स्रोतको परिचालन र उपलब्धिको, सुशासनका आधारभूत कुरा पालना गरेको–नगरेको, पारदर्शिताको अनुगमन गर्नेछ । यस्तै आर्थिक अनियमिततामा शून्य सहनशीलता, मानवअधिकारको पालना गरे–नगरेको, बालबालिका र जेष्ठ नागरिकलाई गर्ने व्यावहारकोसमेत अनुगमन र मूल्याङकन गर्नेछ ।
एसएसपी ज्ञवालीका अनुसार ‘पर्फर्मेन्स अडिट टिम’ जुनसुकै बेला पनि अनुगमन र छड्केमा निस्कन सक्नेछ । ज्ञवालीले भने,‘‘आवश्यकताअनुसार टोली सादा पोशाकमा पनि परिचालन हुन सक्छ ।”
यो विषयमा आफ्नो प्रतिक्रिया दिनुहोस् !