प्याजको मूल्यको घट्यो

‘भारतीय बजारमा नयाँ प्याज आएपछि प्याजको मूल्य घटेको छ । जनकपुरको बजारमा केही समयअघि प्रति किलो २ सय ५० रुपैयाँसम्म पुगेको प्याजको मूल्य घट्न थालेको छ । भारतीय बजारमा नयाँ प्याजको उत्पादन सुरू भएपछि त्यसको असर नेपाली बजारमा पनि देखिन थालेको हो । भारतीय प्याज प्रतिकेजी १ सय ३० रुपैयाँ र थोक बजारमा १ सय १५ रुपैयाँ प्रतिकेजी प्याजको मूल्य रहेको छ । भारतीय भन्दा चिनियाँ प्याज झनै सस्तो छ । आजको मूल्य सूचीअनुसार औसतमा १ सय १५ रुपैयाँ चिनियाँ प्याजको मूल्य कायम भएको छ । यस्तै, थोक बजारमा चिनियाँ प्याजको औसत मूल्य ८५ रहेको कालिमाटी तरकारी बजारका सूचना अधिकारी विनय श्रेष्ठले बताए ।

‘भारतले प्याजमा गरेको प्रतिबन्ध फुकुवा नगरे पनि केही खुकुलो भएको छ । त्यसैले उता मूल्य घटेपछि नेपाली बजारमा पनि मूल्य घटेको हो । यही हप्ताको आइतबारसम्म २०र२२ टन प्रतिदिन प्याजको आयात हुने गरेकोमा मंगलबार ७० तथा बुधबार ६४ टन प्याज भारतबाट आयात भएको श्रेष्ठले बताए । विगत एक महिनामा १३ सय ६० टन प्याज आयात भएकोमा ७ सय ४१ टन चीनबाट ४ सय ३२ टन भारतीय प्याज आएको थियो । बाँकी नेपाली प्याज थियो । भारतबाट आउने प्याज निरन्तर बढेको सूचना अधिकारी श्रेष्ठले जानकारी दिए । भारतमा एक महिनाअघि मात्रै प्रतिकेजी १ सय ५० भारु रहेको प्याज अहिले ७० भारुमा झरेको छ ।

एसियाकै सबभन्दा बढी प्याजको उत्पादन हुने नासिक, गुजरात तथा राजस्थानमा नयाँ प्याजको उत्पादन भएको छ। भारतीय संचार माध्यमकाअनुसार यी ठाउँबाट प्याजको आपूर्ति दुई गुणासम्मले बढेको छ । नासिकमा पछिल्लो केही दिनमा प्याजको मूल्य प्रति क्विन्टल ४ हजार भारुसम्म घटेको छ। संचार माध्यमहरूले थोक प्याजको मूल्य केही दिनमै ३० भारुसम्म पुग्नसक्ने बताएका छन् । मूल्य घट्ने शंकाले किसानहरू प्याज बेच्न हतार गरिरहेको बताइएको छ ।