धनुषा, ०७६ माघ १३ गते ।
नेपालमा कोरोना भाइरस देखिएपछि भारतले नेपाल-भारत सीमामा कडाइ गरेको छ । भारतको स्वास्थ्य मन्त्रालयले नेपालसँग सीमा जोडिएका प्रदेशहरूमा विशेष सावधानी अपनाउन भन्दै निर्देशन जारी गरेको छ ।
सोमबार त्यहाँको स्वास्थ्य मन्त्रालयका सचिव प्रीति सुडानले नेपालसँग सीमा जोडिएका पाँच प्रदेशहरू पश्चिम बंगाल, बिहार, सिक्किम, उत्तर प्रदेश र उत्तराखण्डका उच्च अधिकारीहरूसँगको विशेष बैठकमा सो निर्देशन दिएकी हुन् । केन्द्रको निर्देशनपछि पानीटंकी लगायतका नाकाहरूमा भारतको राज्य सरकारले स्वास्थ्य सावधानीका नाममा कडाइ गर्न थालेको छ ।
नेपालमा सोमबारसम्म चीनबाट आएका दुई जनामा कोरोना भाइरसको संक्रमण पुष्टि भइसकेको छ । भारतले ‘कोरोना भाइरस नेपालबाटै उत्पन्न भएको र यसकै कारण स्वास्थ्य संक्रमणकाल सुरु भएको’जस्तो गरी नेपाल-भारत सीमामा कडाइ गर्नुलाई अर्थपूर्ण दृष्टिले हेरिएको छ ।
झापास्थित काँकडभिट्टा नाकामा पनि अवैध खाद्यवस्तुको चोरी पैठारीसँगै कोरोना भाईरस नेपाल प्रवेश गर्नसक्ने भन्दै उच्च सतर्कता अपनाइएको हो । चेकजाँचमा कडाइ गरिएको इलाका प्रहरी कार्यालय काकरभिट्टाका इन्स्पेक्टर सुभाष खनालले बताए । भारतबाट नेपाल भित्रिने माछा र कुखुरा लगायतका मासुजन्य वस्तुको चेकजाँचमा कडाइ गरिएको इन्स्पेक्टर खनालले जानकारी दिए ।
