धनुषा, ०७६ फागुन २३ गते ।
देशमा हुन लागेको १२ औं जनगणनाका लागि ५२ हजार जनशक्ति खटाइने भएको छ । नेपालमा १९६८ सालदेखि प्रत्येक १० वर्षको अन्तरमा हुदै आएको जनगणनाको लागि ४३ हजार गणक र ९ हजार गणना सुपरिवेक्षक सहित ५२ हजार जनशक्ति परिचालन गरिने केन्द्रिय तथ्यांक विभागका निर्देशक ढुण्डीराज लामिछानेले बताएका छन् ।
केन्द्रिय तथ्यांक विभाग र तथ्यांक कार्यालय धनुषाको आयोजना एवं नेपाल पत्रकार महासंघ धनुषाको समन्वयमा शुक्रवार जनकपुरधाममा आयोजित राष्ट्रिय जनगणना २०७८ को तयारी सन्दर्भमा सञ्चार तथा प्रचार प्रसारका लागि सञ्चारकर्मीसँग अन्तरक्रिया कार्यक्रम गरिएको छ । कार्यक्रममा विभागका निर्देशक ढुण्डीराज लामिछानेले केन्द्रिय तथ्यांक विभागले आगामी २०७८ सालको जेठ २५ गतेदेखि र असार ८ गतेसम्म १२ औं जनगणना गर्न लागेको र संघीय संरचनामा सामुदायिक प्रश्नावलीको प्रयोग गरी सम्पूर्ण घरधूरीहरुको प्रयोजनसहित गणना गर्न लागिएको बताए । विभागका निर्देशक लामिछानेले विगतको जनगणना र यस पटकको जनगणनामा पालिकामा कार्यकारी अधिकृतको अध्यक्षतामा स्थानिय समन्वय समिति, प्रमुख जिल्ला अधिकारीको अध्यक्षतामा जिल्ला समन्वय समिती र वडावस्तरिय सहजीकरण समिती बनाएर जनगणना गरिने बताए ।
जो जहाँ बसोवास गरि रहेको छ त्यहीबाट उनको जनगणना गरिने बताउँदै निर्देशक लामिछानेले बैदेशिक रोजगारको क्रममा बाहिर गएकाहरुको समेत तथ्याक सोहीअनुसार संकलन गरिने बताए ।
धनुषाका प्रमुख जिल्ला अधिकारी प्रदिपराज कणेलले विश्वसनीय तथ्यांक संकलनका लागि खटाइने कर्मचारीहरुलाई फिल्डमै गएर ६ महिना अगावैदेखि तालिम दिइनुपर्नेमा जोड दिएका छन् । उनले भने ‘प्रत्येक स्थानीय तहमा वडाअध्यक्ष र वडा सदस्यको रोहवरमा भाषाको सवालमा सहि तथ्यांक संकलन गर्नु आवश्यक छ ।’
नेपाल पत्रकार महासंघ धनुषाका अध्यक्ष अनिल मिश्रले जनगणनामा खटिने कर्मचारी राजनितिक दल र व्यक्ति विशेषको हुनु नहुने बताएका छन् । जनगणनामा राजनीतिक दलको सिफारिस वा सोर्स फोरसमा गणक नियुक्त गर्न हुनेभन्दै यसले जनगणनाको क्रममा संकलन गर्ने तथ्यांक सहि हुनेमा जोड दिएका छन् । कार्यक्रममा विभागका तर्फबाट निर्देशक ढुण्डीराज लामिछाने, पत्रकार श्यामसुन्दर शशी, पत्रकार मनिका झाले कार्यपत्र प्रस्तुतीकरण गरेकोे तथ्यांक कार्यालय जनकपुरका कार्यालय प्रमुख प्रविण चौधरीले जानकारी दिए ।