दिपेन्द्रप्रसाद सिंह
धनुषा, ०७६ फागुन २६ गते ।
प्रदेश २ का मुख्यमन्त्रि लालवावु राउत महामूर्ख पदको मानपदवीले सम्मानित भएका छन् । मिथिला नाट्य कला परिषद मिनालले प्रत्येक वर्ष होलीको शुभअवसरमा मुख्यमन्त्रि राउतलाई महामूर्खको उपाधिले सम्मान गरेको हो । देश, जनता र समाजका लागि अग्रणी भुमिका निर्वाह गर्ने विशिष्ठ व्यक्तिहरुलाई व्यग्यात्मक शैलीमा महामूर्खदेखि वंशकुरहैरसम्मको १४ वटा मानपदवीले १४ जना व्यक्तिलाई सम्मान गरेको छ ।
मिनापद्धारा आयोजित महामुर्ख सम्मेलनमा भभकौवाको मानपदवीले प्रदेश सांसद परमेश्वर साहलाई सम्मान गरिएको छ । प्रदेश सांसद मनिष सुमनलाई पटमुर्ख, प्रदेश सांसद रामआशिष यादवलाई हराशंख, प्रदेश सांसद रामचन्द्र मण्डललाई सिलौट शंकर, जनकपुरधाम उपमहानगरपालिकाका उपमेयर रिता झालाई टुनमुसरी मानपदवीले सम्मान गरेको छ ।
सम्मानित हुनेहरुमा साहित्यकार रोशन जनकपुरीलाई बलगोवना, बृहत्तर जनकपुर क्षेत्र विकास परिषदका कार्यकारी निर्देशक बलराम ठाकुरलाई खेसारीलाल, महोत्तरी पिपरा गाउँपालिका अध्यक्ष विक्रम चौधरीलाई खापसुरत, संकटमोचन देवशरण माध्यमिक विद्यालयका प्रध्यानाध्यापक बलराम साहलाई बज्रकिट, साहित्यकार पुनम झा मैथिललाई अदलबदली, काग्रेस नेता जीवनाथ चौधरीलाई घर घुसना, नेपाल पत्रकार महासंघ धनुषा शाखा अध्यक्ष अनिल मिश्रलाई लोरहाशंकर र सामाजिक अभियन्ता सुशिल कर्णलाई वंश कुरहैरको मानपदवीले सम्मान गरेको छ । सम्मानित व्यक्तिहरुलाई मिनापका अध्यक्ष परमेश झा र पूर्व अध्यक्ष सुनिल मल्लिकलगायतले स्वागत गर्दै मानपदवी प्रदान गरेका हुन् ।
सम्मानित हुने व्यक्तिहरुलाई तराई मधेशमा पाउने तरकारीको मालाको साथै व्यग्यात्मक चित्र भएको टोपी, गमछा, सम्मानपत्रले सम्मान गरेकोे छ । कलाकारहरुले व्यग्यात्मक शैलीमा आलोचत्नामक तरिकाले आफुलाई यस वर्षको महामूर्खको उपाधि दिएर आफुलाई अझ देश प्रदेशप्रतिको दायित्वबोध गराएको मुख्यमन्त्रि लालवावु राउतले बताएका छन् । आफुले यस प्रकारको व्यग्यात्मक तरिकाले सम्मानित हुने पहिलो पटक मौका पाएकाले आफुलाई यो क्षण अविस्मरणीय रहने मुख्यमन्त्रि राउतले बताए ।
जानकी मंदिर परिसरमा आयोजित महामूर्ख सम्मेलनमा विभिन्न कविहरुले व्यग्यात्मक रुपमा कविता पाठ समेत गरेका छन् ।
यो विषयमा आफ्नो प्रतिक्रिया दिनुहोस् !