धनुषा, ०७६ चैत्र ३ गते ।
धनुषाको मिथिला विहारी नगरपालिकाको वडा नं. १ भुतही पर्टेवाको मुसहर वस्तीमा ६ वटा रक्सी पसल संचालनमा रहेका छन् । अवैध रक्सीको सेवनले धनुषामा २० जनाभन्दा बढीको मृत्यु भएपनि अवैध रक्सीको कारोवार भने भुतही पर्टेवामा अहिलेसमेत हुदैछ ।
मिथिलाविहारी नगरपालिकाको वडा नं. १ मा एक सय घर परिवार मुसहर समुदायका छन् । अधिकांश मुसहर समुदायले दिनहुँ रक्सी खानैपर्ने कडा नियम झै वस्तीमा भएका छन् । एक सय घरपरिवार रहेको सो वस्तीमा ६ वटा रक्सी पसल संचालनमा रहेका छन् । ६ वटा रक्सी पसलमध्ये ५ वटा पसल विशुद्ध रक्सी बेच्नकै लागि खोलिएको छ । बाँकी १ वटा किराना दोकानमा रक्सी पाउने गरेको छ । अन्य किराना पसलमा समेत लेवल साना सोफीलगायतको रक्सी पाउने गरेको स्थानियबासिन्दाहरुले जानकारी दिएका छन् ।
भुतहीको एउटै टोलमा किराना पसलसंगै अवैध दारुको कारोवार गर्नेहरुमा राजेन्द्र सदा, नाम थाहा नभएको तेजनगरवाला, रामउदगार दास, रामसोगारथ मण्डल, सिकिल सदा र अजय मण्डललगायतले रक्सी बेच्दै आएको नाम नखोल्ने शर्तमा एक समाजसेवीले जानकारी दिएका छन् ।
स्रोतका अनुसार सो वस्तीमा मात्रै दैनिक २० हजारदेखि ३० हजारको रक्सीको व्यापार हुने गरेका छन् ।
स्रोतका अनुसार सो पसलहरुमा अवैध रक्सी धनुषाको हरिपुर भन्ने मालटोल र तारापटटी सिरसियाबाट आउने गरेको छ । यस्ता अवैध कारोवारबारे स्थानिय जनप्रतिनिधी र प्रहरी प्रशासन बेखवर रहेका छन् ।