धनुषा, ०७६ चैत १३ गते ।
प्रदेश २ का मुख्यमन्त्री तथा मन्त्रिपरिषद्को कार्यालयले चैत १२ गते विज्ञप्ति जारी गर्दै विश्वभर फैलिदै गरेको कोरोना भाइरसबाट बच्न सङ्घीय सरकारले जारी निर्देशनहरुमा प्रदेश सरकारको पूर्ण समर्थन रहेको भन्दै अक्षरशः पालना गर्न प्रदेशवासीलाई आह्वान गर्नुभएको छ ।
मुख्यमन्त्रि राउतले जारी गर्नुभएको विज्ञप्तिमा कोरोना महामारीविरुद्ध लड्न तीनवटै तहको सरकार तथा सर्वसाधारणको एकता नै महामारीविरुद्धको बलियो हतियार रहेको उल्लेख छ ।
प्रदेशमा २५० आइसोलेशन वेड तयारी अवस्थामा रहेको र थप आइसोलेशन वेडको लागि गृहकार्य भइरहेको जनाइएको छ । विपद व्यवपस्थापन कोषमार्फत प्रत्येक जिल्लाको विपद् व्यवस्थापन कोषलाई ५० लाखको दरले उपलब्ध गराउने, नेपाल प्रहरी प्रादेशिक कार्यालय जनकपुरलाई रु २० लाख, सशस्त्र प्रहरी प्रादेशिक कार्यालयलाई रु २० लाख, राष्ट्रिय अनुसन्धान आयोग प्रादेशिक कार्यालयलाई रु. पाँच लाख उपलब्ध गराइएको छ ।
प्रदेश २ मा सामाजिक विकास मन्त्रालयमार्फत कोरोनासम्बन्धी उपचार र रोकथामका लागि प्रादेशिक अस्पताललाई रु. १२ लाख, जिल्ला अस्पतालहरुलाई रु. पाँच लाखको दरले, प्रादेशिक स्वास्थ्य आपूर्ति केन्द्रलाई औषधि र व्यक्तिगत उपचार उपकरणका लागि रु. १० लाख, प्रादेशिक जनस्वास्थ्य प्रयोगशालालाई रु. पाँच लाख, जनचेतनामूलक प्रचारप्रसारको लागि स्वास्थ्य निर्देशनालयलार्ई रु. पाँच लाख, मन्त्रालयमार्फत नीतिगत खर्चका लागि रु. १० लाख, सरोकारवालालाई सचेतनामूलक अभियानका लागि रु. १५ लाख, स्थानीय तह स्वास्थ्य संयोजकहरुको अभिमुखीकरणको लागि रु. १० लाख, एकीकृत अनुगमनको लागि रु. पाँच लाख, एम्बुलेन्स सेवाको लागि रु. तीन लाख छुट्याइएको र अतिरिक्त महामारी नियन्त्रणका लागि थप रकमको आवश्यकता परेको खण्डमा प्रदेश सरकार तयारी अवस्थामा रहेको विज्ञप्तिमा उल्लेख छ ।
दिपेन्द्रप्रसाद सिंह