दिपेन्द्र प्रसाद सिंह
धनुषा, मङ्सिर २४ गते । ७१ औं अन्र्तराष्ट्रिय मानव अधिकार दिवसको अवसरको मङ्सिर २४ गते जनकपुरमा वृहत्त प्रभातफेरि कार्यक्रम गरिएको छ । जनकपुरको जानकी मंदिरबाट विहान ७ बजे इन्सेक प्रदेश २, राष्ट्रिय मानवअधिकार आयोगको प्रादेशिक कार्यालय जनकपुर, मुख्यन्यायधिवक्ताको कार्यालय प्रदेश २, ओरेक नेपाल, महिला मानव अधिकार संजाल, जिल्ला महिला अधिकार सरोकार समुह, एडभोकेसी फोरम नेपाल, थर्ड एलान्यसलगायतको मानवअधिकारको क्षेत्रमा कार्यरत दर्जनौ संघ संस्थाको अगुवाईमा बृहत प्रभातफेरि गरिएको छ ।
जनकपुरको जानकी मंदिरबाट सुरु भएको प्रभातफेरि जनकचोक, शिवचौक, भानुचोक हुदै स्टेशनचोकमा गएर कोणसभामा परिणत भएको थियो । प्रभातफेरिमा प्यावसन धनुषा, एन प्यावसन धनुषा, नेपाल प्रहरी, सशस्त्र प्रहरीलगायतको समेत सहभागिता रहेको थियो ।
कोणसभामा बोल्दै उच्च अदालत जनकपुरका बरिष्ठ न्यायधिश वावुराम रेग्मीले विश्वभरमा महिला र बालबालिकाहरुको अवस्था मानवअधिकारको हिसावले नाजुक भएकाले उहाँको हक र अधिकारलाई ख्याल गर्नुपर्ने आवश्यकता रहेको बताउनुभएको छ । संसारका सवै मानव एक हुन् र सवैलाई समान व्यवहार गर्नुपर्ने हुन्छ भन्दै यो नै मानवअधिकार हो बताउनुभएको छ । हामीले कुनै पनि काम गर्दा सदैव मानवअधिकारको उल्लघन भयो कि भन्ने हिसावले सचेत हुदै मानवअधिकारको रक्षा गर्दै अगाडी बढ्नुपर्ने बताउनुभयो ।
कोणसभामा बोल्दै प्रदेश २ का सांसद रामअशिष यादवले मानवअधिकारको हनन् हुने देश द्धन्द्धमा फस्छ र द्धन्द्धमा फसेका देशले आर्थिक प्रगति र समृद्धितर्फ उन्मुख हुन नसक्ने भएकाले गर्दा यसप्रति हामी सवै मानव सचेत हुनुपर्ने धारणा व्यक्त गर्नुभएको छ ।
हामी सवै मानवअधिकारकर्मीहरु मानवअधिकारको रक्षक हौ भनेर संकल्प लिएर अगाडी बढ्न सकेको खण्डमा देश र जनताहरुको भविष्य सुखद हुने बताउनुभएको छ ।
