दीपेन्द्रप्रसाद सिंह
जनकपुरस्थित प्रादेशिक अस्पतालबाट स्वास्थ्य बिमाकर्ताहरुले समयमा औषधि नपाएको गुनासो गरेका छन् । नेपाल सरकारले स्वास्थ्य बिमाकार्ड लागू गर्दै ५ जनाको सदस्य भएको परिवारले ३५ सय रुपैयाँ तिरेर वर्षमा एक लाखसम्मको निशुल्क औषधि र स्वास्थ्य चेकजाँच गराउन पाउने व्यवस्था गरेको छ ।
उपचार गराउन जाँदा समयमा सेवा नपाउनुको साथै औषधिसमेत नपाएको जनकपुरधाम उपमहानगरपालिका– १६, पुलचोकका ८० वर्षीय शंकर महतोले गुनासो गरे । स्वास्थ्य बिमा कार्डसहित सोमबार प्रादेशिक अस्पताल पुगेका महतोले स्वाथ्य जाँच गराए पनि औषधि भने नपाएको बताए । ‘जाँचे मात्रै । औषधि दिएनन् । बाहिरको क्लिनिकबाट किन्नु भनेको छ,’ उनले सुनाए ।
नियमतः स्वास्थ बिमा गराएकाहरुले एक लाख रुपैयाँसम्मको औषधि निशुल्क पाउनुपर्ने हो । तर साधारण औषधिसमेत अस्पतालबाट नपाउँदा स्वास्थ्य बिमा कार्यक्रमप्रति नै अविश्वास बढ्न थालेको छ ।
महोत्तरीको गौशाला नगरपालिका– १, रामनगरका ५० वर्षीय विनोद भारतीले पनि निजी क्लिनिकबाटै औषधि किन्नु परेको गुनासो सुनाए । ‘थोरै रकममै परिवारका ५ जनासम्मका लागि एक लाखसम्मको निशुल्क औषधि उपचार पाउने भनेर बिमा गरियो । तर कुरै मात्रै रहेछ । बढी खर्च हुने भनेकै औषधि हो, त्यही औषधि चाहिँ किन्नु परेपछि बिमा गरेको के फाइदा भो र !’ उनले भने ।
स्वास्थ्य बिमा बोर्डका पूर्वसंयोजकसमेत रहेका श्याम गिरीले परिवारको स्वास्थ्य बिमा गराए पनि प्रादेशिक अस्पतालबाट पाउनुपर्ने सेवा र निशुल्क औषधि पाउन नसकेको बताए । आफूले पनि छोरा बिरामी भएर प्रादेशिक अस्पताल जनकपुरमा चेकजाँच गराउँदा आवश्यक औषधि बाहिरबाटै किन्नु परेको सुनाए ।
प्रादेशिक अस्पताल जनकपुरधामले स्वास्थ्य बिमा कार्यक्रम सुरु भएयता कात्तिक २४ गतेसम्म २ हजार १ सय ७८ जनालाई सेवा दिएको स्वास्थ्य बिमा बोर्ड प्रदेश २ का संयोजक रमेन्द्रप्रसाद कुशवाहाले जानकारी दिए । अस्पतालमा दैनिक १० देखि १५ जनासम्म बीमित बिरामी आउने गरेको अस्पतालका बालरोग विशेषज्ञ डा. जामुन सिंहले बताए । उनका अनुसार बीमितहरुको उपचारका लागि अस्पतालले २ जनामात्र जनशक्ति खटाएकाले भ्याउन कठिन छ । तर पनि बीमितहरुको चेकजाँच भने हुँदै आएको उनले बताए ।
‘अस्पतालको फार्मेसीमै औषधि नभएकाले बीमितहरुलाई दिन सकिएको छैन । अस्पताल समितिले बाहिर क्लिनिकबाट औषधि खरिद गरेको बिलको रकम भुक्तानी नगर्न भनेकाले समस्या भएको हो,’ उनले भने ।
