धनुषा, ०७६ मङ्सिर २८ गते ।
दिपेन्द्रप्रसाद सिंह
धनुषाको क्षिरेश्वरनाथ नपा ५ स्थित राजेश साहको घरमा शुक्रवार राति शक्तिशाली बम विस्फोट हुँदा ३ जनाको मृत्यु भएको छ । २ जनाको घटनास्थलमा र एक जनाको उपचारको क्रममा मृत्यु भएको छ । विस्फोटमा परेर ३ जना गम्भिर घाइते भएका छन् । विस्फोटमै परि घरमुली भिखारी साहलगायतको ४ जना सामान्य घाइते समेत भएको छ ।
धनुषाको क्षिरेश्वरनाथ नगरपालिका ५ स्थित शुक्रबार मध्यराति (१२ः१०) बजे भएको बम विस्फोटमा भिखारी साहका ४८ वर्षीय छोरा राजेश साह, मृतकका छोरा ३० वर्षका आनन्द साहको घटनास्थलमै मृत्यु भएको छ भने इलाका प्रहरी कार्यालय महेन्द्रनगरका इन्स्पेक्टर अमिर कुमार दाहालको सुनसरीस्थित विपी कोइराला स्वास्थ्य विज्ञान प्रतिष्ठानमा उपचारको क्रममा मृत्यु भएको हो । विस्फाटमा परि इलाका प्रहरी कार्यालय महेन्द्रनगरका प्रहरी जवान रिजननाथ महतो, मृतक राजेश साहका १८ वर्षीय छोरा प्रकाश साह, छोरी १७ वर्षीय अंजनी साह गम्भिर घाइते भएको छ ।

गम्भिर घाइते चारै जनालाई जनकपुरस्थित प्रादेशिक अस्पतालमा प्राथमिक उपचार गरि थप उपचारको लागि सुनसरीस्थित विपी कोइराला स्वास्थ्य विज्ञान प्रतिष्ठान धरान पठाइएको छ ।
विस्फोटमा परि मृतक राजेश साहका वुवा ६० वर्षीय भिखारी साहको टाउकोमा चोट लागेको छ । उहाँको जनकपुरस्थित प्रादेशिक अस्पतालमा उपचार हुदैछ । विस्फोटमै परि मृतक राजेश साहका छिमेकी ४६ वर्षीय मो. अक्वर मंसुरी र उहाँको श्रीमती ३५ वर्षीय सविना खातुन समेत घाइते हुनुभएको जिल्ला प्रहरी कार्यालय धनुषाका डिएसपी रामेश्वर कार्कीले जानकारी दिनुभएको छ ।
घटना कसरी भयो
शुक्रबार राति १२ बजे राजेश साहको घर भित्र गेटमा झोलामा बम जस्तो देखिने शंकास्पद वस्तु झुण्डयाइएको देखिएको मृतक राजेश साहका ६० वर्षीय वुवा भिखारी साहले बताउनुभएको छ । झोलामा शंकास्पद वस्तु देखेपछि राजेश साह इलाका प्रहरी कार्यालय महेन्द्रनगर पुगेर इन्स्पेक्टर अमिर दाहालको मोवाइलबाट घरमा फोन गरि सवैजनालाई घर बाहिर निस्कन भन्नुभएको थियो । घटनास्थलमा राजेश साह इन्स्पेक्टरसहितको प्रहरी भ्यानसंगै आउनुभएको थियो ।

इन्स्पेक्टरको नेतृत्वमा शंकास्पद वस्तु बम हो वा होइन भनी हेरियो, तर इन्स्पेक्टरले बम होइन् जस्तो छ, पुरानो कुकर होला भनी सवै जनालाई बोलाउनुभएको थियो । सवैजना बम रहेको स्थान वरिपरि बसेर इन्स्पेक्टरले फोनमा कुरा गरि रहेकै वेलामा विस्फोट भएको घटनास्थलका प्रत्यक्षदर्शी घाइते भिखारी साहले इन्सेक धनुषा प्रतिनिधीलाई जानकारी दिनुभएको छ ।
बम कसले किन राखेको होे भन्ने बारेमा अहिलेसम्म एकिन जानकारी आउन नसकेको र घटनाबारे सुक्ष्मतरिकाले अनुसन्धान तीव्र रुपमा भई रहेकोे धनुषाका डिएसपी रामेश्वर कार्कीले बताउनुभएको छ ।