काठमाडौं । पछिल्लो समय नेपाल प्रहरीले एकपछि अर्काे सफलता हात पार्दै गएको छ । सर्वेन्द्र खनाल प्रहरी महानिरीक्षक (आइजिपी) भएपछि एकाध बाहेक अधिकांश घटनामा प्रहरीको सफलता देखिँदै आएको छ । संगठनभित्रका विभिन्न समस्या पनि उनले पार लगाएका छन् । यसै सेरोफेरोमा विदेशमा लुकेका अपराधी नेपाल ल्याउने, अन्तर्राष्ट्रिय समुदायमा नेपाल प्रहरीको छवि उच्च बनाउने काम पनि सर्वेन्द्रले गरेका छन् ।
हामीसँगको कुराकानीमा आइजिपी खनालले भनेका थिए, ‘नेपाल प्रहरीको छविलाई अन्तर्राष्ट्रिय स्तरमा चिनाउन सफल भएको छु ।’ साँच्चै उनले भनेजस्तै अहिले नेपाल प्रहरी संसारभरका न्युजको हेडलाइन बनेको छ, त्यो पनि ठूलो अपरेशनलाई लिएर । आइजिपी खनालको नेतृत्वमा अहिले उत्तरी छिमेकी चीनका नागरिकविरुद्ध प्रहरीले ठूलो अपरेशन चलाएको छ । त्यो हो सर्च एण्ड एरेष्ट अपरेशन । पर्यटन भिसामा नेपाल आई नेपालमा बसेर चीनसहित अन्य देशमा साइबर अपराध गर्न सक्रिय चिनियाँ नागरिकलाई नेपाल प्रहरीले एकैपटक धमाधम समातेको छ । हालसम्म प्रहरीले १२१ चिनियाँ नागरिकलाई यस्ता गतिविधिमा संलग्न रहेको भन्दै पक्राउ गरेको हो । ८ सय भन्दा बढी चिनियाँहरु निगरानीमा छन् ।
चिनियाँ पक्राउको समाचार संसारका प्रतिष्ठित सञ्चारमाध्यमको हेडलाइन बनेको छ । स्वयं चीनले पनि नेपाल प्रहरीलाई धन्यवाद दिँदै प्रशंसा गरेको छ । सीमापार संगठित अपराध र साइबर क्राइममा सक्रिय समूहको जालो तोडेर प्रशंशनीय कार्य गरेको भन्दै चीनले खुसी समेत व्यक्त गरेको छ । वास्तवमा चिनियाँ नागरिक समात्ने योजना आइजिपी खनालले नै बनाएका हुन् । केही महिनाअघि चिलीमा भएको इन्टरपोलको महासभामा भाग लिन गएका आइजिपी खनालले चिनियाँ नागरिकले नेपालमा बसेर साइबर अपराध, ह्याकिङ गरिरहेको सूचना पाएका थिए । त्यहीँ महासभाबाट उनले चिनियाँविरुद्ध एक्सन लिनुपर्ने एक खालको म्याण्डेट नै पाए । नेपाल फर्किएर उनले सुरुमा चिनियाँ ह्याकरलाई समात्न सफल भए । ती ह्याकरले नेपालका बैंकबाट करोडौं रुपैयाँ लुट्न लागेका थिए ।
त्यसअगाडि नेपाली चेलीबेटीलाई विवाह गरेर लैजाने र चीनमा यौनदासी बनाउने गिरोहको समेत नेपाल प्रहरीले पत्ता लगाई कारवाही गरेको थियो । यसरी नेपालमा बसेर विभिन्न अपराध गर्ने चिनियाँ नागरिकविरुद्ध खनालको नेतृत्वमा सिलसिलेवार कारवाहीले नेपाल प्रहरीको साख विश्वस्तरमा बढाएको छ भने खनालको नेतृत्वलाई पनि पुष्टि गरेको छ ।
त्यसो त खनालले नेपालमा हत्या गरेर २० वर्षदेखि अमेरिकामा लुकेर बसेका व्यक्तिलाई समेत नेपाल झिकाउन सफल भए । हामीसँगको अन्तर्वार्ताले उनले भनेका थिए, ‘अमेरिका कहि मान्छे फिर्ता गर्छ, तर हामीले ल्याउन सफल भयौं ।’ यसबाट नेपाल प्रहरीको कुटनीति पनि बलियो भएको मान्न सकिन्छ ।
त्यसो त संयुक्त राष्ट्रसंघमा पनि आइजिपी खनालको नेतृत्वमा नेपाल प्रहरीले राम्रो स्थान पाएको छ । यस हिसाबले सर्वेन्द्रको मूल्यांकन गर्दा उनी बोलेर भन्दा गरेर देखाउने कमाण्डर हुन भन्न सकिन्छ । यद्यपि उनको सफलतामा संगठनको पनि उतिकै योगदान छ ।
यो विषयमा आफ्नो प्रतिक्रिया दिनुहोस् !