धनुषा,०७९ माघ ८ गते ।जनकपुरधाम उपमहानगरपालिका –८ पिरारी पछवारि टोल बस्ने २० वर्षीय रोहितकुमार साह र सोही उपमहानगरपालिका– १३ पिडारी टोलका २२ वर्षीय विष्णु साहको अपहरण गरि भारतको सितामढी जिल्लाको बेला परिहारमा हत्या गरेको आरोपमा महोत्तरी जिल्लाको मनरा सिसवा नगरपालिका–२ ईटहर्वा बस्ने २४ वर्षीय किसन कुमार पंडित र सोही पालिका बस्ने २४ वर्षीय मुकेश पासवानलाई जिल्ला प्रहरी कार्यालय धनुषाले माघ ८ गते गिरफतार गरेको छ ।
पुस २७ गते जनकपुरबाट मामा घर भारतको सितामढी बेला परिहार गएको बेलामा अपहरणमा परेका थिए । अपहरणकारीले भारतीय मोवाइलबाट ५० लाख र पछि २० लाख रुपैयाँ ंफिरौती मागिएको थियो । परिवारजनले फिरौती मागिएको भन्दै यही माघ ४ गते जिल्ला प्रहरी कार्यालय धनुषामा प्रहरीमा उजुरी दिएका थिए ।
जिल्ला प्रहरी कार्यालय धनुषाले भारतीय प्रहरीसँग मिलेर अनुसन्धान गर्दा बिहारको सितामढीमा खाडलमा गाडिएको अवस्थामा दुई जनाको शव माघ ८ गते विहान फेला परेको जिल्ला प्रहरी कार्यालय धनुषाका प्रवक्ता प्रहरी नायब उपरीक्षक प्रदीपबहादुर क्षेत्रीले जानकारी दिनुभयो ।
पोस्टमार्टमका लागि शव सितामढीको अस्पतालमा राखिएको छ । हत्या आशंकामा भारतीय प्रहरीले समेत तीन जनालाई भारतबाट गिरफतार गरेको छ । भारतीय प्रहरीले गिरफतार गरेको व्यक्तिहरुको नाम खुलाइएको छैन् ।
यो विषयमा आफ्नो प्रतिक्रिया दिनुहोस् !