धनुषा । ०७६ पुस २० गते ।
माघ ९ गते हुन गइरहेको राष्ट्रिय सभा सदस्यको निर्वाचनका लागि प्रदेश २ मा ४ सिटका लागि ८ जना प्रत्यासित उम्मेदवारहरुले पुस २० गते मनोयनपत्र दर्ता गराएका छन् । पुस २० गते निर्वाचन आयोगले मनोनयनपत्र दर्ता गर्ने कार्यतालिका अनुसार प्रदेश २ मा विभिन्न दलबाट ८ जनाको उम्मेदवारी परेको निर्वाचन आयोग जनकपुर निर्वाचन अधिकृत राजु खतिवडाले जानकारी दिनुभएको छ ।
प्रदेश २ मा नेपाल कम्युनिष्ट पार्टी (नेकपा) र राष्ट्रिय जनता पार्टी नेपालको तर्फबाट ४ जनाले उम्मेदवारले मनोयन पत्र दर्ता गराएका छन् । कांग्रेस र समाजवादी पार्टीको तर्फबाट पनि संयुक्त रुपमा ती सिटहरुमा मनोयन दर्ता गराएका हुन् ।
नेकपाको तर्फबाट महिलातर्फ तुलसा दाहाल र दलिततर्फ राधेश्याम पासवान तथा राजपाको तर्फबाट अन्य पुरुष समूह (खुल्ला) मा मृगेन्द्र सिंह यादव र अल्पंख्यक वा अपांगताबाट शेखर सिंहले मनोयन पत्र दर्ता गराएका छन् ।
नेकपा र राजपाको उम्मेदवारहरुको प्रस्तावक र समर्थक संयुक्त रुपमा रहेका थिए । नेकपातर्फबाट तुलसा दाहालको प्रस्तावक शत्रुधन महतो, समर्थक परमेश्वर साह, राधेश्याम पासवानको प्रस्तावक सत्यनारायण मण्डल, समर्थक रामनरेश राय, मृगेन्द्र सिंह यादवको प्रस्तावक नवलकिशोर साह, समर्थक सुन्दरमणि विश्वकर्मा र शेखर सिंहको प्रस्तावक रामचन्द्र मण्डल, समर्थक जितेन्द्र सोनल रहेका थिए ।
कांग्रेसबाट महिलातर्फ नगिना यादव, अपांगता वा अल्पसंख्यकमा भोला पजियार र समाजवादीबाट दलिततर्फ रामपृत पासवान र अन्य पुरुष समूह (खुल्ला) तर्फ अनिरुद्ध सिंहले मनोयन गराएका छन् । यी मध्ये सबै नयाँ हुन तर समाजवादीका दलिततर्फ रामपृत पासवान यसअघि सदस्य रहिसकेका छन । उनलाई फेरी यसपटक निरन्तरता दिइएको छ ।
कांग्रेस उम्मेदवारहरुको प्रस्ताव समर्थकमा नगिना यादवको शिवचन्द्र चौधरी, विजय शंकर साह,भोला पजियारको रामसरोज यादव, बालेश्वर मण्डल रहेका छन् । समाजवादीको उम्मेदवारहरु रामपृत पासवानको प्रस्तावकमा रामआशिष यादव, समर्थक अशोक यादव र अनिरुद्ध सिंहको प्रस्तावक शैलेन्द्र यादव, समर्थकमा चमेलीदेवी दास रहेका छन् ।
उम्मेदवारी दर्ता गराउन अघि नेकपा र राजपाका तथा कांग्रेस र समाजवादी दुई समूहमा विभाजित भई सयौं कार्यकर्ता सहित नारा जुलुसका नगरपरिक्रमा गर्दै निर्वाचन आयोगको कार्यालय पुगेका थिए । निर्वाचन कार्यालयले मनोयन पत्र दर्ताका लागि नेकपा र राजपालाई दिउंसो १ बजेदेखि र कांग्रेस तथा समाजवादीलाई २ बजेपछिको समय दिएको थियो ।
प्रदेश २ मा ४ सिटको लागि नेकपा र राजपाको गठबन्धन रहेको छ भने काग्रेस र समाजवादीको गठबन्धन गरिएको छ । दुवै गठनबन्धनले आफुहरुले चुनाव जित्ने भन्दै दावि गरेका छन् ।
