धनुषा, ०७६ माघ ६ गते ।
सुदूरपश्चिम प्रदेश सभाको पाँचौ अधिवेशन ५ महिना ५ दिनपछि मंगलबार सुरु भएको छ । गत भदौ १ गते सम्पन भएको अधिवेशन आजदेखि सुरु भएको हो ।
अधिवेशनको पहिलो दिन प्रदेशसभामा प्रतिनिधित्व गर्ने तीन दलका नेताहरुले सम्बोधन गरेका थिए । सत्तापक्षका सांसद तारा लामा तामाङले प्रदेश सरकारको बचाउ गरे पनि प्रमुख प्रतिपक्ष दल नेपाली कांग्रेस र राजपाले सरकारको चर्काे आलोचना गरे ।
कांग्रेस संसदीय दलका नेता डा. रणबहादुर रावलले प्रदेश सरकारका मन्त्री विनालगामका घोडा हुँदा प्रदेशमा भष्ट्राचारले सीमा नाघेको आरोप लगाए । प्रदेश सरकारले हालसम्म ३ वटा बजेट तथा कार्यक्रम ल्याउँदासमेत जनमुखी काम नभएको उनको आरोप थियो । केही मन्त्रीहरु जनताप्रति उत्तरदायी नभई स्वेच्छाचारी ढंगले अघि बढेको आरोप लगाउँदै नेता रावलले उनीहरुलाई ठीक ठाउँमा ल्याउन मुख्यमन्त्रीलाई विशेष आग्रहसमेत गरे । ‘सामाजिक विकास मन्त्रालयले खरिद गरेको एम्बुलेन्स र अल्ट्रासाउण्ड मेसिनमा आर्थिक अनियमितता तथा बाजुराको बडीमालिकामा सञ्चालन गरेको स्वास्थ्य शिविरमा भएको डुब्लिकेशनको भन्दै छानबिन हुनुपर्छ,’ उनले भने ।
नेता रावलले सुदूरपश्चिम प्रदेशको भूमि व्यवस्था, कृषि तथा सहकारी मन्त्रालयमा कृषकका नाममा व्यापक आर्थिक अनियमितता हुने गरेको आरोप लगाए । प्रदेश सरकारले ३२ वटा कानुन बनाएको दावी गरे पनि कार्यान्वयनको अवस्था फितलो हुँदा प्रदेश सरकार भएको अनुभूति जनताले गर्न नपाएको नेता रावलको भनाइ छ ।
राष्ट्रिय जनता पार्टी (राजपा)की प्रदेशसभा सदस्य मालामती कुमारी रानाले कुनै समय सुदूरपश्चिम प्रदेश ७ नम्बर प्रदेशले चिनिए पनि अहिले भष्ट्रचार र अनियमिततामा १ नम्बरमा झरेको दावी गरिन् । उनले प्रदेश सरकारले कमी कमजोरीलाई बेलैमा नसुधार्ने हो भने प्रदेश सरकार नै खतरामा पर्ने बताइन् । प्रदेश सरकारले खरिद गरेका एम्बुलेन्स, अल्ट्रासाउण्ड मेसिन, मुख्यमन्त्री कप खेलकुद प्रतियोगिता र कृषि सामग्रीमा ठूलो भष्ट्राचार हुदाँसमेत सरकार मौन बसेको आरोप लगाएकी छन् ।
नेकपा प्रमुख सचेतक तथा प्रदेशसभा सदस्य तारालामा तामाङले भने सरकारको बचाउ गरे । उनले प्रदेश सरकारले जनताको पक्षमा काम गरिरहेको बताए । प्रदेशमा रहेको सामाजिक कुरीतिको अन्त्यका लागि सरकारले अभियान थालेको उनले दावी गरे । देखिएका कमीकमजोरीलाई सुधार्दै बनेका कानुनहरु कार्यावन्यनमा प्रदेश सरकारको ध्यान केन्द्रित हुनुपर्नेमा भने सांसद तामाङले जोड दिएका छन् ।
प्रदेश सभाको अर्को बैंठक मंगलबार १२ः३० मा बस्ने प्रदेशसभा सचिवालयले जानकारी दिएको छ ।
