धनुषा,०७६ माघ १४ गते ।
प्रदेश नंं २ ले पहिलो पटक ‘जनसांख्यिक स्थिति’ सार्वजनिक गरेको छ । प्रदेशको प्रदेश नीति तथा योजना आयोगले संयुक्त राष्ट्र संघीय जनसंख्या कोष (यूएनएफपीए)को सहयोगमा जानसांख्यिक स्थिति प्रतिवेदन तयार पारेको हो ।
प्रतिवेदनअनुसार सन् २०१९ मा सो प्रदेशको प्रक्षेपित जनसंख्या ६१ लाख ५८ हजार ६४९ जना रहेको अनुमान छ । यो नेपालको जनसंख्याको २१.४ प्रतिशत हो ।
प्रक्षेपणअनुसार प्रदेश नं. २ को सर्लाही जिल्लामा सबैभन्दा बढी ८ लाख ८१ हजार ४१३ तथा सिराहा जिल्लामा सबैभन्दा कम ६ लाख ९६ हजार ६५७ जनसङ्ख्या छ ।
प्रदेश नं. २ मा सन् २००१–२०११ मा जनसंख्या वृद्धिदर १.६ प्रतिशतमा छ, यो राष्ट्रिय वृद्धिदर १.३५ प्रतिशतभन्दा बढी हो ।
प्रतिवेदनअनुसार सो प्रदेशका ७२ प्रतिशत मानिस नगरपालिका क्षेत्रभित्र बसोबास गर्दछन् । पर्सा जिल्लामा सबैभन्दा कम ५९ प्रतिशत र रौतहट जिल्लामा सबैभन्दा बढी ९३ प्रतिशत जनसङ्ख्या नगरपालिका क्षेत्रमा बसोबास गर्ने गरेको प्रतिवेदनमा उल्लेख छ ।
४८ प्रतिशत गरिब
प्रदेश नं २ मा ४८ प्रतिशत नागरिकहरू बहुआयामिक गरिब छन्, यो राष्ट्रिय औसतभन्दा निकै बढी हो । राष्ट्रिय रूपमा बहुआयामिक गरिबी २९ प्रतिशत छ । प्रदेशका ८ जिल्लामध्ये रौतहटमा सर्वाधिक गरिबी छ भने पर्सामा केही कम छ ।
प्रदेशका १७ प्रतिशत जनसंख्यासँग रेडियो, टेलिभिजन, मोबाइल, साइकलसहितका कुनै पनि सरसाधनहरू छैन । गरिबहरूका संख्या बढी भए पनि प्रदेशका ९६.२ प्रतिशत जनसंख्या आफ्नै घरमा बस्छन्, यो राष्ट्रिय औसतभन्दा बढी हाे ।
प्रमुख भाषा मैथली
प्रतिवेदनअनुसार सो प्रदेशमा ११९ जातजाति बसोबास गर्दछन् । ती मध्ये यादव (१५ प्रतिशत), मुसलमान (११.६ प्रतिशत), थारु (५.३ प्रतिशत), तेली (५.१ प्रतिशत) र कोइरी÷कुशवाहा (४.६ प्रतिशत) प्रमुख जातजाति हुन् ।
प्रदेशमा बोलिने भाषाहरुमा मैथिली (४५.३ प्रतिशत), भोजपुरी (१८.६ प्रतिशत), बज्जिका (१४.६ प्रतिशत), नेपाली (६.७ प्रतिशत) र उर्दू (५.९ प्रतिशत) लगायतका भाषा रहेको प्रतिवेदनले देखाएको छ ।
यो विषयमा आफ्नो प्रतिक्रिया दिनुहोस् !