दिपेन्द्रप्रसाद सिंह
धनुषा, ०७६ फागुन १ गते ।
धनुषाको महेन्द्रनगर बम काण्डका मुख्ययोजनाकार मानिएका प्रहरीको माोस्ट वान्टेड सुचिमा रहेको नेकपा(विप्लव)का प्रदेश व्युरो सदस्यलाई प्रहरीले पक्राउ गर्न सफल भएका छन् । महेन्द्रनगर बम काण्ड घटनाका मुख्य योजनाकार मानिएका धनुषाधाम नपा–६ सरस्वतीपुरका ३४ वर्षीय साहस भनेर चिनिने इन्दल साहलाई सुरुङ्गा नपा–६ बाट माघ २९ गते पक्राउ गरेको प्रहरी स्रोतले जनाएको छ ।
इलाका प्रहरी कार्यालय कडरबोना सप्तरीबाट खटेको प्रहरीको टोलीले पक्राउ गरेका साहलाई फागुन १ गते धनुषा प्रहरीलाई जिम्मा लगाएको सप्तरीका एसपी कृष्ण प्रसाईले जानकारी दिएका छन् । हत्या, ज्यान मार्ने उद्योग, बम विष्फोट, धम्की, चन्दा सङ्कलन, सङ्गठित अपराधलगायतको घटनामा प्रहरीको मोस्ट वाण्टेड सूचीमा रहेका साहलाई चन्दा सङ्कलनका लागि सप्तरी आएको बेला गिरफ्तार गरिएको एसपी कृष्ण प्रसाईले बताए ।
धनुषाको क्षिरेश्वरनाथ नपा–५ स्थित महेन्द्रनगरमा मङ्सिर २७ गते राति भएको बम बिष्फोटलगायतको घटनाको मूख्य योजनाकारका रूपमा साह प्रहरीको मोस्ट वान्टेड सूचीमा रहेका आरोपित हुन् । क्षिरेश्वरनाथ नपा–५ महेन्द्रनगरस्थित राजेश साहको घरमा ०७६ मङ्सिर २७ गते राति १२ः१० बजे भएको बम विस्फोटमा परी इलाका प्रहरी कार्यालय महेन्द्रनगरमा कार्यरत इन्स्पेक्टर अमिरकुमार दाहाल, घरधनी ४८ वर्षीय राजेश साह र निजको छोरा १६ वर्षीय आनन्दकुमार साहको मृत्यु भएको थियो ।
बम विस्फोटमै परेर ७० वर्षीय राजेशका बुवा भिखारी साह, राजेशका छोरा १९ वर्षीय प्रकाश साह, राजेशकी छोरी १७ वर्षीया अञ्जली साह, छिमेकीहरु अकवर मन्सुर, सकिला खातुन, निक्की साह र प्रहरी जवान रिजनाथ महतो घाइते हुनुभएका छन् ।
घटनापछि मुख्य योजनाकार मानिएका विप्लव समुहका केन्द्रीय सदस्य नेता आदम राइनलाई धनुषा प्रहरीले पुस १६ गते गिरफ्तार गरेपछि साह सप्तरीमा खटिएका थिए । सप्तरीमा चन्दा सङ्कलनमा खटिएको जानकारी पाएको सप्तरी प्रहरीले साहलाई सुक्ष्म निगरानीमा राखेको थियो ।
