धनुषा, ०७६ फागुन ६ गते ।
जनकपुरधाम उपमहानगरपालिका वडा नं.८ ज्ञानकुपस्थित कविर बाल आश्रममा मंगलवार साँँझ १६ हजार नगद सहयोग गरिएको छ । दोहा कतारको मल्टिपलेक्स कम्पनीमा कार्यरत दिनेश शर्माको समन्वयमा ७ जना युवाहरुले गरेको सहयोग रकम क्षिरेश्वरनाथ डटकमका सम्पादक दिपेन्द्रप्रसाद सिंहको समन्वयमा मंगलवार साँझ मानवअधिकारकर्मीहरुको उपस्थितीमा प्रदान गरिएको छ ।
राष्ट्रिय मानवअधिकार आयोग प्रदेश २ जनकपुरका निर्देशक विरबहादुर बुढा मगर, इन्सेक प्रदेश २ का संयोजक राजु पासवान, मानवअधिकार अधिकृत मनमाया मगर र क्षिरेश्वरनाथ डटकमका सम्पादक दिपेन्द्रप्रसाद सिंहले संयुक्त रुपमा आश्रमका संचालक सन्त सत्यनारायण आलोकलाई प्रदान गरेका छन् ।
आश्रममा हाल १३ जना बालवालिकाहरु रहेका छन् । सवैभन्दा कम ७ महिनाको बच्चा रहेको छ । आश्रमका ९ जना बालबच्चाहरु विद्यालयमा भर्ना भएका छन् । आश्रम संचालनमा आर्थिक अभाव रहेको समाचार पढेर दोहा कतारबाट दिनेश शर्माले यसअघि समेत आश्रममा १५ हजार सहयोग गरेका थिए ।
आश्रममा दोहा कतारबाट सन्तोष साह, सुन्दर कुमार दास, इन्द्रकुमार मण्डल, विरेन्द्र कुमार कापर, दिपेन्द्र यादव, राजनारायण दास र गौरीनन्द चौधरीको सहयोग गरेका थिए ।
राष्ट्रिय मानवअधिकार आयोगका प्रदेश २ निर्देशक विरबहादुर बुढामगरले आश्रमका संचालक सन्त सत्यनारायण आलोकले आमावुवाले हेला गरि फालिएको बालवालिकाहरुलाई आफनो सन्तान सम्झेर पालनपोषण गर्नु सवैभन्दा ठुलो सेवा भएकाले खुशी हुदै धन्यवाद व्यक्त गरेका छन् ।
निर्देशक मगरले आलोक बाबाको महान कार्यमा बैदेशिक रोजगारको क्रममा विदेशी भूमिमा अहोरात्र खट्दै आश्रममा सहयोग गर्नुहुने सवै युवाहरुलाई कृतज्ञता ज्ञापन गरेका छन् । इन्सेक प्रदेश २ संयोजक राजु पासवानले आश्रमका बालवालिकाहरुलाई हामी सवैले सहयोग गर्नुपर्ने बताएका छन् । हामी एक दुई छोराछोरीको पालनपोषण गर्न दिन रात मेहनत गरि रहनुपर्दछ तर आश्रमका संचालकले एक साथ १३ जना बालवालिकाहरुलाई पालन पोषण गर्नु महान सेवाको उदाहरणीय उत्प्रेरक भएको बताएका छन् ।
मानवअधिकार अधिकृत मनमाया मगरले प्रदेश २ कै एक मात्र कविर बाल आश्रममा आफु आउन पाउँदा खुशी लागेको बताए । उनले भनिन् हामीले मानव सेवा गर्नुपर्ने पाठ पढ्दै आएका छौं, तर आज यस आश्रममा आएर प्रत्यक्ष अनुभुति भई रहेको बताएकी छिन् ।
आश्रमका संचालक सन्त सत्यनारायण आलोकले बैदेशिक रोजगारीको सिलशिलामा दोहा कतार पुगेका समाजसेवी मनका धनि श्रमिक भाईहरुले बचत गरेर पठाउनुभएको सहयोगप्रति हार्दिक आभार प्रकट गरेका छन् । आश्रम संचालक आलोकले विदेशबाट आएका रकम सहयोग गराउन समन्वय गर्ने क्षिरेश्वरनाथ डटकमका सम्पादक दिपेन्द्रप्रसाद सिंह र दिनेश शर्मालाई हार्दिक धन्यवाद ज्ञापन गर्दै आगामी दिनहरुमा समेत आश्रमलाई सहयोग गरि रहन आग्रह गरेका छन् ।
