धनुषा,०७६ फागुन १७ गते ।
धनुषा जिल्लाको सबैला नगरपालिका–१२ रघुनाथपुरमा नहर चोक बस्ने ५५ वर्षीय सोनेलाल पुलामीलाई बाँसको चिरपटले प्रहार गरि हत्या गरिएको छ । गएराति रक्सी खाएर अपशब्द बोल्दै गरेका युवाहरुलाई स्थानियहरुले प्रतिवाद गर्न खोज्दा ती युवाहरुले आक्रमण गरेका थिए ।
बाँसको चिरपटले सोनेलाल पुलामीको टाउकोमा प्रहार गरेपछि उपचारको लागि जनकपुर ल्याउँदै गर्दा बाटोमै मृत्यु भएको मृतकका छोरा सूर्यनारायण पुलामीले बताएका छन् । गहुँ खेतमा जंगली जनावरले क्षति गर्ने गरेकाले बाली हेरेर आउँदै गर्दा नशाले मातेका दुई समुहका युवाहरु झगडा गरि रहेको देखेपछि सम्झाउने क्रममा पुलामीको टाउकोमा बाँसको चिरपटले प्रहार गरि हत्या गरेको मृतकका छोरा सूर्यनारायणको भनाई रहेको छ ।
मृतक पुलामीको शव पोस्टमार्टमको लागि प्रादेशिक अस्पताल जनकपुरमा राखिएको छ । पीडितपक्षले जिल्ला प्रहरी कार्यालय धनुषामा ६ जना युवाविरुद्ध किटानी जाहेरी दिएको छ । जाहेरी दिए लगतै जिल्ला प्रहरी धनुषाले हत्या घटनामा सलग्न आरोपमा ५ जनालाई पक्राउ गरेको छ ।
पक्राउ पर्नेमा सबैला नगरपालिका १ का १९ वर्षीय कपिल सदा, १९ वर्षीय अशेष यादव, २३ वर्षीय धर्मदेव राउत, २४ वर्षीय जितेन्द्र राउत र १९ वर्षीय मोनु यादव रहेका छन् । घटनामा सलग्न आरोपित २० वर्षीय अमरजित यादव फरार रहेकाले उनको खोजी कार्य भई रहेको जिल्ला प्रहरी धनुषाले जनाएको छ ।