धनुषा, ०७६ चैत २७ गते ।
प्रदेश २ को आठवटै जिल्ला भारतीय सिमानाकासंग खुल्ला रहेकाले हालसम्म पनि लुकिछिपी नेपाल भारत आउजाउ भई रहेकाले सिमानाकामाा थप कडाईका साथ एक हजार थप सशस्त्र प्रहरी परिचालन गरिएको प्रदेश २ का आन्तरिक मामिला तथा कानुनमन्त्रि ज्ञानेन्द्र कुमार यादवले जानकारी दिनुभएको छ ।
क्षिरेश्वरनाथ डटकमसंग कुराकानी गर्नुहुदै मन्त्रि यादवले भारतमा कोरोना भाइरसका संक्रमितहरुको संख्या बढि रहेकाले गर्दा नेपालमा प्रवेश हुन सक्ने भन्दै उच्च सतर्कता अपनाउँदै सिमानाकामा कडाइ गरिएको जानकारी दिनुभयो ।
यता, देशभरको सिमानाकाको मूल नाकाहरूमा मात्र सशस्त्र प्रहरी बलको ‘बोर्डर आउट पोस्ट’ (बीओपी) रहेकोमा अवदेखि छोटी भन्सार नाकासहित सीमा क्षेत्रका सम्भाव्य सबै आवतजावतको बाटो रोक्ने गरी सशस्त्र प्रहरी बल तैनाथ गरिएको छ । नेपाल–भारत सीमा सुरक्षामा सशस्त्र प्रहरी बल परिचालित गरिँदै आएको छ ।
‘केही दिनअघिसम्म नेपाल–भारत सीमाका १२० बीओपीमा रहेको जनशक्तिले सीमा क्षेत्र हेर्दै आएकोमा अहिले त्यो ९२५ वटा र्पुयाइएको छ,’ सशस्त्र प्रहरी बलका प्रवक्ता, प्रहरी नायव महानिरीक्षक (डीआईजी) प्रवीणकुमार श्रेष्ठले भने– ‘आवश्यकताअनुसार यसलाई अझ बढाउने तयारीमा छौं ।’
उनका अनुसार मुख्य बीओपी र नजिकका अन्य ब्यारेकहरूबाट समेत परिचालित जनशक्ति थपेर सीमा क्षेत्रमा सशस्त्र प्रहरी बलका ससानो टुकडी परिचालित गरी सीमामा आवतजावत रोक्ने काम भइरहेको छ ।
‘अब सीमा क्षेत्रको हरेक २–२ किलोमिटरको दूरीमा रहेको सशस्त्र प्रहरीको पोस्टले सीमाक्षेत्रको पूरै निगरानी गर्नेछ र सम्भावित आवतजावतमा रोक लगाउनेछ,’ प्रवक्ता श्रेष्ठले भने ।
मूल नाकाबाट यसअघि नै रोक लगाइ सकिएको भए पनि सीमा क्षेत्रनजिक बसोबास गर्नेहरू र भारतमा रोजगारीका लागि गएकाहरूले छोटी भन्सार नाका र यसअघि तस्करहरूले प्रयोग गर्दै आएका चोरबाटोबाट आवत–जावत गर्दै आएका छन् ।
