धनुषा, ०७७ बैशाख २७ गते ।
जनकपुरधाममा ४२ वेडसहितको कोरोना भाइरस उपचारका लागि स्थापित ‘कोरोना विशेष अस्पताल’ बैशाख २७ गते देखि सञ्चालनमा आएको छ । प्रादेशिक अस्पताल जनकपुरअन्तर्गत रहेको जनकपुर नर्सिंग क्याम्पसमा सम्भावित कोरोना संक्रमित गर्भवतीको प्रसुति साथै शल्यक्रिया गर्नेसमेत व्यवस्था रहेको छ ।
५० वेडमा ८ वेड आइसीयुको व्यवस्था रहेको सामाजिक विकास मन्त्रालयका सचिव डा. रामप्रसाद घिमिरेले जानकारी दिनुभएको छ । जनकपुरधामस्थित प्रादेशिक अस्पतालमा सञ्चालित लेभल १ को सो कोरोना अस्पतालबाट सिफारिस गरिएका मध्यम, जटिल र अतिजटिल बिरामीको सो विशेष अस्पतालमा उपचार हुने उनले जानकारी दिनुभयो ।
कोरोना संक्रमित बिरामीलाई नुहाउन, लुगा धुन, लुगा सुकाउनुको साथै बिरामीहरुलाई हिँडडुल गर्न पर्याप्त ठाउँको सुरक्षित व्यवस्था मिलाइएको जनाएको छ । ‘कोरोना विशेष अस्पतालमा स्टाफ स्टाफको बिचमा इन्फेक्सन हुन नदिन, नजिकका बस्ती वा समाजमा संक्रमण फैलिन नदिन र उपचारका उपकरणहरुको निर्मलीकरण गर्ने व्यवस्था मिलाएको डा.जामुन सिंहले बताउनुभयो ।
प्रादेशिक अस्पतालमा आएका कोरोना संक्रमण शंकास्पद बिरामी तथा कोरोना पुष्टि भएका बिरामीलाई विशेष अस्पतालमा राखेर उपचार गरिने छ ।
उपचारमा प्रादेशिक अस्पतालकै चिकित्सकहरु खटिने डा. सिंहले बताउनुभयो । हालसम्म यस क्षेत्रमा संक्रमित नदेखिएको तथा प्रादेशिक अस्पतालमा कोहि पनि कोरोना संक्रमित बिरामी आएका छैनन् ।
यस्तै, संक्रमण फैलिन नदिन सरकारले गरेको लकडाउन सुरु भएको भोलि पल्ट चैत १२ गतेदेखि बन्द रहेको प्रादेशिक अस्पतालको ओपिडी तगा अप्रेशनलगायतको सम्पूर्ण सेवा बैशाख २५ गतेदेखि नियमित रुपमा सुरु भएको डा. सिंहले बताउनुभयो । कोरोना विशेष अस्पताल सञ्चालनमा आएपछि कोरोनाको उपचारमा महत्वपुर्ण योगदान पुग्ने प्रादेशिक अस्पतालका डा. जामुन सिंहले विश्वास व्यक्त गर्नुभएको छ ।
दिपेन्द्रप्रसाद सिंह
