धनुषा, ०७७ बैशाख ३१ गते ।
धनुषामा कोरोना भाइरस (कोभिड–१९) सक्रमण पुष्टि भएका ४० वर्षीय पत्रकार, ३५ वर्षीय पुस्तक व्यवसायी, २० वर्षीया महिला र १८ वर्षीय किशोरमा कोरोना पुष्टि भएपछि उहाँनीहरूलाई आइसोलेसनमा भर्ना गरिएको हो ।
महोत्तरीको जलेश्वर नगरपालिका घर भएका ३५ वर्षीय पुस्तक व्यवसायी पनि जनकपुरको पिडरियामाई स्थानमा बस्दै आउनुभएको छ । कोरोना संक्रमण देखिएका पत्रकार, पुस्तक व्यवसायी र महोत्तरीका किशोरलाई प्रादेशिक अस्पताल, जनकपुरमा भर्ना गरिएको छ भने २० वर्षीया महिलालाई मिथिला नगरपालिकाको लालगढस्थित आइसोलेसन वार्डमा भर्ना गरिएको छ ।
यसैगरी, कोरोना पुष्टि भएका महोत्तरीको बलवा नगरपालिका–१०, धमौरा बस्ने १८ वर्षीय किशोर केही दिनदेखि धनुषाको नगराइन नगरपालिका गंगुलीस्थित क्वारेन्टाइनमा छन् । भारतको पटना बस्दै आइरहेको महोत्तरी घर भएका १८ वर्षीय किशोर धनुषाको नाका हुँदै वैशाख ६ गते नेपाल प्रवेश गरेपछि प्रहरीले नियन्त्रणमा लिई गंगुलीस्थित क्वारेन्टाइनमा राख्न लगाएको बताइएको छ ।
यता, कोरोना संक्रमण पुष्टि भएका पत्रकारको कन्ट्याक्ट ट्रेसिङ (सम्पर्कमा आएकाको खोजी) सुरु भएको धनुषाका प्रमुख जिल्ला अधिकारी कोषहरि निरौलाले जानकारी दिनुभएको छ । “कोरोना पुष्टि भएका सबैजनालाई आइसोलेसनमा पठाइएको छ, परिवारका सदस्यहरूलाई पनि क्वारेन्टिन गरेका छौं,” निरौलाले भन्नुभयो कोरोना संक्रमितहरुले भेटेका सवै व्यक्तिहरुको समेत कन्ट्याक्ट ट्रेसिङ सुरु भइसकेको छ ।
