धनुषा, ०७७ जेठ २ गते
नेपाल कम्युनिष्ट पार्टीले प्रदेश नं २ को लालबाबु राउत नेतृत्वको सरकार कोरोना भाइरस (कोभिड–१९) संक्रमण नियन्त्रण गर्न गैरजिम्मेवार भएको आरोप लगाएको छ । नेकपा प्रदेश २ का अध्यक्ष प्रभु साह र सचिव सुमनराज प्याकुरेलले आज (शुक्रबार) एक प्रेस बिज्ञप्ति जारी गर्दै कोरोना भाइरस नियन्त्रणमा प्रदेश २ सरकारको गैरजिम्मेवारीपूर्ण, उदासीन र चरम लापरवाहीका कारण सिंगो प्रदेश सन्त्रासमा रहेको आरोप लगाएका छन् ।
‘समान्यतया कुनै पनि प्रकारको महासंकट र महाविपत्तिको सामना गर्न संघीय मुलुकमा संघले नीति निर्माण एवं निर्देशनात्मक कार्य गर्दछ भने, प्रदेश सरकार अग्रभागमा रहेर दृढता एवं तदारुकताका साथ आफ्नो कामकार्वाही तथा जिम्मेवारी निरन्तर बहन गर्नुपर्ने हो । तर २ नबर प्रदेश सरकार गैरजिम्मेवार बनेका कारण आज सिङ्गो प्रदेशको यो हविगत देख्न तपाई–हामी बाध्य भएका छौं’ नेकपा प्रदेश २ ले जारी गरेको बिज्ञप्तिमा उल्लेख गरिएको छ ।
नेकपाले शुरुदेखि नै २ नम्बर प्रदेश अन्य प्रदेशको तुलनामा मुख्यतः नेपाल–भारत खुल्ला सीमा र उच्च जनघनत्वका कारण बढी संवेदनशील र जोखिमयुक्त बताउँदै आएको छ । अहिले देशभरमा भेटिएका २५८ जना कोरोना संक्रमितमध्ये लगभग अधिकांश २ नंबर प्रदेशकै हुनु गम्भीर चिन्ताको विषय भएको नेकपा प्रदेश २ ले जनाएको छ ।
अहिले नेपालमा पनि कोरोना संक्रमणको तेस्रो चरणमा प्रवेश गरिसकेको गम्भीर अवस्थामा सोही अनुसार परीक्षणको मोडालिटी बिकास गर्न आवश्यक रहेको नेकपा प्रदेश २ ले जनाएको छ ।
विदेशबाट स्वदेश फिर्ता हुने नेपाली नागरिकको अनुमानित संख्यालाई मध्यनजर गर्दै तत्काल आवश्यक क्वारेन्टाइनको निर्माण तथा आइसोलेशनको क्षमतामा बृद्धि, आवश्यक मात्रामा आईसीयु बेड तथा भेन्टिलेटरको प्रबन्धसहित २ नम्बर प्रदेशका प्रत्येक जिल्लामा तत्काल बृहत् संख्यामा कोरोना संक्रमितको परीक्षण गर्नका लागी पिसिआर प्रविधि सहितको भरपर्दो परीक्षणशाला निर्माण, जिल्ला जिल्लामा कोरोना विशेष अस्पताल निर्माण लगायतका माग नेकपा प्रदेश २ ले गरेको छ ।
कामविहीन दक्ष जनशक्तिको उच्चतम प्रयोगको वातावरण निर्माणमा इमान्दारीताका साथ दृढसंकल्पित भएर युद्धस्तरमा लाग्न प्रदेश सरकार सहित सम्बन्धित सबै सरोकारवाला पक्षसँग नेकपाले जोडदार माग गरेको छ ।
पछिल्लो समय कोरोना भाइरसको संक्रमण मुख्यतः प्रदेश नम्बर २ लगायत देशभर नै बढ्दो क्रममा रहेकाले यथाशीघ्र लकडाउनलाई वैज्ञानिक एवं भुगोल सुहाँउदो व्यवहारिक रुपमा व्यवस्थित गर्दै अगाडि बढ्न सुझाव नेकपाले सरकारलाई दिएको छ ।
यस्तै लकडाउन अझ पनि लम्बिने सम्भावना प्रवल नै रहेकाले भारत लगायत अन्य देशमा रोजगारी र अध्ययनका लागि गएका नेपाली नागरिकहरुमध्ये अहिले स्वदेश फर्कन इच्छुकहरुलाई एकीन गरी वैध, व्यवस्थित तथा सुरक्षित तवरले स्वदेश फिर्ता बोलाउने वातावरण तत्काल तयार गर्न संघीय सरकारको नेकपाले गम्भीर ध्यानाकर्षण गराएको छ ।
महासंकटको यस चुनौतीपूर्ण समयमा जोखिम न्यूनीकरणको प्रमुख आधार सामाजिक दूरी कायम गर्दै स्वयंसेवी भूमिकासहित समाजमा सचेतना फैलाउने र आफूभन्दा असहाय, गरीब–विपन्न, ज्याला–मजदूरी गर्ने तथा जरुरतमन्दहरुलाई आवश्यक सहयोग गर्ने लगायतका सामाजिक कार्यहरुमा सक्रिय रहन पार्टी पंक्तिका सम्पूर्ण सदस्यहरुलाई नेकपा प्रदेश २ ले बिशेष आग्रह गरेको छ ।
निकट भविष्यमा पार्टी–संगठनमा नेतृत्व मुल्यांकनको एउटा प्रमुख आधार कोरोना विरुद्धको संघर्षमा कसको कस्तो भूमिका थियो पनि हुने भएकोले यसमा २ नम्बर प्रदेश, नेकपा मातहतका सम्पूर्ण इमानदार नेता–कार्यकर्तालाई अग्रभागमा रहेर आफ्नो भूमिका खेल्न विशेष अह्वान र अनुरोध नेकपाले गरेको छ ।
साथै यस कार्यमा पहिलादेखि नै कुशलतापूर्वक लागिपरेका पार्टीका नेता–कार्यकर्ता एवं समाजसेवी व्यक्तित्वहरु र कर्तव्यनिष्ठ जनप्रतिनिधिहरु सबैमा नेकपाले हार्दिक आभार सहित विशेष धन्यवाद व्यक्त गरेको छ ।
यसैगरी विश्वसँगै नेपालमा पनि महाविपत्तिको रुपमा फैलिएको कोरोना भाइरस संक्रमणको जोखिमयुक्त अवस्थामा आफ्नो ज्यान जोखिममा राखेर अहोरात्र खटिरहेका चिकित्सक, स्वास्थ्यकर्मी, सुरक्षाकर्मी, स्वयंसेवकहरुप्रति नेकपाले उच्च सम्मान, संक्रमितहरुको शिघ्र स्वास्थ्यलाभको कामना र ज्यान गुमाएकाप्रति भावपूर्ण श्रद्धाञ्जली अर्पण गरेको छ ।
