धनुषा, ०७७ जेठ ५ गते ।
प्रदेश २ को प्रादेशिक अस्पताल जनकपुरधाममा हुदै आएको कोरोना भाइरस कोडिभ–१९ को परिक्षण कार्य बन्द गरिएको छ । जनकपुरको पीसीआर मेसिनले गरेको परिक्षण र काठमाण्डौमा भएको एउटै नमुनाको परिक्षण फरक पर्दै आएकाले गर्दा पिसिआर मेसिन विग्रेको भन्दै जनकपुरमा दोश्रो पटक बन्द गरिएको छ ।
यसअघि पहिलो मेसिन पनि राष्ट्रिय प्रयोगशालाले पठाएको पीसीआर मेसिनले भरपर्दो नतिजा दिन नसकेको भन्दै बन्द गरिएको थियो । गत २४ वैशाखमा संकलित पत्रकारहरुको स्वाब परीक्षण गर्दा प्रादेशिक अस्पतालस्थित पीसीआर मेसिनले नेगेटिभ नतिजा दिएको थियो ।
तर, राष्ट्रिय प्रयोगशाला टेकुमा परीक्षण गर्दा एकजना पत्रकारसहित दुईजनामा पोजेटिभ देखिएपछि पीसीआर मेसिन बन्द गरिएको प्रादेशिक प्रयोगशालाका निमित्त प्रमुख रामविनय साहले बताउनुभयो ।
पहिलो पटक प्राविधिकहरुले जडान गरेपनि पछिल्लो पटक पीसीआर मेसिन प्रयोशालाका निर्देशक डा. रुणा झा आफै जनकपुर आएर पिसिआर मेसिन जडान गर्नुभएको थियो । निर्देशक स्वयं आफैं आएर मेसिन जडान गर्न लगाएपछि पछिल्लो भन्दा अहिलेको मेसिन भरपर्दो हुने विश्वास गरिएको भएपनि अहिले पुनः टेष्ट बन्द गरि काठमाण्डौंको टेकुस्थित राष्ट्रिय प्रयोगशालामा पठाइने गरिएको छ ।
प्रादेशिक प्रयोगशाला र टेकुको रिपोर्ट पटकपटक फरक पर्न थालेपछि यहाँ कार्यरत प्राविधिकहरुको दक्षतामा समेत प्रश्न उठ्न थालेको छ । कतिपय जानकारहरु प्राविधिकलाई पर्याप्त तालिम नदिँदा यस्तो समस्या आएको बताएका छन् ।
यसैविच, प्रदेश २ सरकारले जनकपुर र राजविराजको लागि रियल टाइम पिसिआर मेसिन खरिद गर्ने तयारीमा रहेको मुख्यमन्त्रि लालवावु राउतले जेठ ४ गते प्रदेशवासीको नाममा गरेको सम्बोधनकै त्रममा उल्लेख गर्नुभएको छ ।
मेसिन खरिद गर्नका लागि प्रदेश सरकारले टेन्डर प्रक्रिया अघि बढाई सकेको प्रदेश सरकारका प्रवक्ता समेत रहनुभएका आन्तरिक मामिला तथा कानुनमन्त्री ज्ञानेन्द्रकुमार यादवले बताउनुभएको छ ।
यो विषयमा आफ्नो प्रतिक्रिया दिनुहोस् !