धनुषा, ०७७ जेठ २३ गते ।
धनुषामा कोरोना भाइरस (कोभिड–१९ ) बाट संक्रमित भएका व्यक्तिहरुलाई राख्ने निमार्ण गरिएको क्वारेन्टाइन र आइसोलेशन वार्ड महिला मैत्री नभएको भन्दै मानवअधिकारको क्षेत्रमा कार्यरत संघसंस्थाहरुले पालिकाका उपप्रमुख तथा उपाध्यक्षहरुलाई ध्यानाकर्षण गराएका छन् ।
मानव अधिकार तथा स्वास्थ्यसँग सम्बन्धित ऐन कानुनहरु कार्यान्वयनको लागि तिनै तहको सरकार तत्पर रहेको वेला कोभिड–१९ बाट प्रभावित खास गरेर महिलाहरुको सवालमा महिला मैत्री क्वारेन्टाइन र आइसोलेशनको व्यवस्था गर्न मानवअधिकारबादी संघसंस्थाहरुले ध्यानाकर्षण गराएका छन् ।
कोरोना कोभिड–१९ सम्बन्धी क्वारेन्टाइन सञ्चालन तथा व्यवस्थापन गर्न बनेको संघ, प्रदेश र स्थानीय मापदण्ड २०७६ बमोजिम घना बस्तीबाट टाढा, १ सय भन्दा बढीलाई राख्न सक्ने क्षमता भएको, सञ्चार, स्वास्थ्य पानी, बिजुलीको पूर्ण व्यवस्था भएको र प्रति व्यक्ति ७५ वर्ग फिटको स्थान वा न्यूनतम दुरी साढे तीन फिट हुनुपर्ने, नियमित सरसफाई हुनुपर्ने लगायतको व्यवस्था रहेको छ ।
तर, २०७६ चैत १४ गतेदेखि संचालन गर्दै आएको धनुषाको सबैला नगरापलिका–१२ वरकुर्वामास्थित श्री फकिरचन्द गामी माविको क्वारेन्टाइनमा कोरोना आशङ्कित विरामीहरुलाई भुइमै राखिएकोबारेमा मानवअधिकारकर्मीहरुको ध्यानाकर्षण भएको हो ।
रेक नेपाल धनुषा जिल्ला परियोजना संयोजक रोजलिन कुमारी सिंह, तराइ मानवअधिकार रक्षक संजाल(थर्ड एलाइन्स) का प्रदेश संयोजक विनोद महरा, इन्सेक प्रदेश २ संयोजक राजु पासवान, सेफ नेपाल धनुषा अध्यक्ष रामप्रमेश मण्डल, महिला मानव अधिकार रक्षक संजाल, धनुषा अध्यक्ष शिला झा, एमनेष्टी ईन्टरनेशनल महिला समुह,४६ का अध्यक्ष इन्दिरा चौधरीद्धारा हस्ताक्षरित ध्यानाकर्षण पत्रमा महोत्तरी जिल्लाको गौशाला नगरपालिकाले खानाको उचित व्यवस्थापन नगरेपछि सोही नगरपालिका स्थित निगौल माविको क्वारेन्टाइनमा रहेका २५ जना जेठ १० गते २४ घण्टा भन्दा बढी समयदेखि भोक भोकै बस्नु परेको उल्लेख छ ।
क्वारेन्टाइनमा राखिएका व्यक्तिहरूका लागि खाने र बस्ने व्यवस्था राम्रो नभएको, एउटै कोठामा कोच्चाएर राखिएको, पुरूष र महिलाका लागि अलगै शौचालयको व्यवस्था नभएको, महिलाका लागि सेनिटरी प्याडको व्यवस्था नभएको, तातो पानी, पोषिलो खाना, चप्पल, साबुन र सेनिटाइजर लगायत सरसफाइका सामग्रीहरू नभएको क्वारेन्टाइनमा बस्नेहरुले गुनासो गर्दै आएको छ ।
विपद तथा प्रकोपको बेलामा धनुषाको विदेह नगरपालिका स्थित एक क्वारेन्टाइनमा रहेकी ३५ वर्षीया महिलामाथि वैशाख ११ गते राती बलात्कारको प्रयास भएको र लकडाउनकै समयमावधिमा ओरेक धनुषामा मात्रै ८० वटा महिला हिंसाका घटना दर्ता भएकोले मानवअधिकारकर्मीहरुको ध्यानाकर्षण भएको जारी ध्यानाकर्षण पत्रमा उल्लेख छ ।
हिंसाका घटनाहरु लकडाउन र विपदको घडीमा बढेकाले स्थानिय पालिकाको न्यायिक समितीको भुमिका अझ सक्रिय हुनुपर्नेमा मानवअधिकारकर्मीहरुको ठम्याई रहेको छ ।
स्थानीय पालिकाका उपमेयर÷उपाध्यक्ष ज्यूहरुको संयोजकत्वमा रहेको अनुगमन समितिले क्वारेन्टाइनको अनुगमन गरी त्यहाँका महिला तथा बालिकालाई परेको समस्याको पहिचान गरी कोरोना भाइरस रोकथाम, उचार तथा नियन्त्रणका कार्यलाई व्यवस्थित रुपमा प्रभावकारी बनाउन अग्रसर भई नागरिकको स्वास्थ्य अधिकारको प्रत्याभूति गर्नका लागि समयसापेक्ष योजनाहरुको तर्जुमा गरी कार्यान्वयन गर्न जरुरी रहेको जारी ध्यानाकर्षण पत्रमा उल्लेख छ ।
दिपेन्द्रप्रसाद सिंह
.
.
.
