डिभिजन वन कार्यालय जेलेश्वरमा आइतबार साँझ फेला परेको शंकास्पद वस्तु सोमबार दिउँसो डिस्पोज गरिएको छ । सोमबार बिहानदेखि नै डिस्पोज गर्ने भनिएपनि तेस्रो पटककाे प्रयासमा दिउँसो डिस्पोज सफल भएकाे हाे ।
कार्यालयको प्रांगणमा रहेको एचआर २६ एस ४२८१ भारतीय नम्बरको पुरानो कार मुनी शंकास्पद कालो झोला फेला परेको थियो । सो झोलामा प्रेसर कुकर बम रहेको र सो भित्र बारुद तथा फलामका टुक्रा रहेको रणधिन गणका गणपति कर्नेल विदुर अधिकारीले बताए ।
बम डिस्पोज गर्न नेपाली सेनाको बम डिस्पोजल टोली, शसस्त्र प्रहरी र नेपाल प्रहरी सो स्थानमा आइतबार साँझ नै पुगेका थिए । टोलीले अध्याँरो भएपछि वरपरका क्षेत्रका मानिसलाई अन्यत्र पठाइ रातभरी सुरक्षा प्रदान गरी सोमबार बिहानबाट डिस्पोज प्रक्रिया अघि बढाएको थियो ।
वन कार्यालयका कर्मचारी वन रक्षक नवराज विष्टका अनुसार दिउँसो साढे ४ बजे मोटरसाइकलमा एक अपरिचित युवक आएर केही बेर कार्यालय परिसरमा बसेका थिए । विष्टले सोधिखोजी गर्दा आफ्नो पनि दाजु कर्मचारी भएको बताएर ती युवा केही बेरमा त्यहाँबाट गएका थिए । त्यसको केही समयमै प्रांगणमा रहेको कारको तल सो शंकास्पद वस्तु भेटिएको थियो ।
ति युवाले नै झोला छाडेको हुन सक्ने र युवाको खोजी तथा अनुसन्धान भइरहेको प्रहरीले जनाएको छ ।
यो विषयमा आफ्नो प्रतिक्रिया दिनुहोस् !