धनुषा, ०७७ असार ९ गते ।
जनकपुरधाम उपमहानगरपालिकाका मेयर लालकिशोर साह र उपमेयर रिता मिश्रको विरोधमा जनकपुरका ५ जना वडाध्यक्षलगायतको जनप्रतिनिधीहरु आन्दोलित भएका छन् । असार ९ गते विहान १० बजेदेखि कार्यालयको मुख्य गेटमै धर्नामा बस्दै चर्को नारावाजी गरि रहेका छन् ।
धर्नामा वडा नं. ७ का अध्यक्ष जानकीराम साह, वडा ४ का अध्यक्ष सुदर्शन सिंह, वडा १० का अध्यक्ष मिथिलेश कर्ण, वडा ९ का अध्यक्ष परमेश्वर साह, वडा ३ का अध्यक्ष दिपेन्द्र साहलगायतको जनप्रतिनिधीहरुको उपस्थिती रहेको छ । असन्तुष्ट वडाध्यक्षले कालोपटटी बाँधेर नगरको हरहिसाव पादर्शीताको माग गर्दै भ्रष्ट मेयर र उपमेयर मुर्दावाद, राजिनामा देउ लगायतका नारा लगाउँदै आएका छन् ।
यसअघि असार ८ गते अवेर साँझसम्म जनकपुरधाम उपमहागरपालिकाका सभाकक्षमा बसेको बोर्ड बैठकमा जनप्रतिनिधीहरुविच भएको विवाद उग्र रुप लिएपछि बैठक कक्षको एक दर्जनभन्दा माथि कुर्सीमा असन्तुष्ट वडाध्यक्षहरुले तोडफोड गर्दै म्यानुट च्याति दिएका छन् ।
नगरको योजना तर्जुमा समितिको छलफल बैठकमा मेयर लालकिशोर साह, उपमेयर रिता मिश्रलगायतको वडाध्यक्ष र ४ जना असन्तुष्ट वडाध्यक्षहरुबीच नगरको योजना र खर्चको हिसाव किताव पार्दशिताको सवालमा धक्कामुक्की भएपछि वडा नम्बर १० का ५५ वर्षीय अध्यक्ष मिथिलेश कर्ण भुईमै लडेका थिए ।
एक्कासी मेयर साहले योजना तर्जुमाको लागि म्यानुटमा हस्ताक्षर गर्न लगाउन थालेको भन्दै वडा नं. ७ का अध्यक्ष जानकीराम साहले म्यानुट च्यातेको बताउनुभयो । आफुहरुलाई योजना तर्जुमाबारे २४ घण्टा पहिले नै जानकारीका साथ अध्ययनको लागि प्रतिवेदन दिनुपर्ने हो तर त्यसो नगरि एक्कासी हस्ताक्षर गर्न लगाउन थालेपछि आफुहरुले विरोध गर्दा मेयर पक्षका मान्छेहरुले आफुहरुमाथि दुव्र्यवहार गरेको वडा नं. ३ का अध्यक्ष दिपेन्द्र साहले बताउनुभयो ।
जनकपुरधाम उपमहागरपालिकाले निमार्ण गरेको बैठक सञ्चालन सम्बन्धि कार्यविधि सम्बन्धी १२ नम्बर बुँदाको १ मा उल्लेखमा २४ घण्टा पहिले जानकारीसहित अध्ययनका लागि प्रतिवेदन दिनुपर्ने उल्लेख छ । तर नीति तथा कार्यक्रम अध्ययन गर्न नै नदिई सीधै बोर्ड बैठकमा उपलब्ध गराइएकोले आफुहरुले अलोकतान्त्रिक विधिको विरोध गरेको वडा नं. ४ का अध्यक्ष सुदर्शन सिंहको भनाई छ ।
वडाध्यक्ष जानकीराम साहले म्यानुट च्यातेपछि असन्तुष्ट वडाध्यक्षहरुलाई प्रहरी बोलाएर नगरको मुख्यगेटमा ताला लगाएर भित्र बन्दी बनाएर राखेको वडा न.९ का अध्यक्ष परमेश्वर साहले बताउनुभयो ।
यता, जनकपुरधाम उपमहानगरपालिकाका उपप्रमुख रिता मिश्रले बोर्डको बैठक शुरु हुनै नदिएरर वडा नम्बर ७ का वडाध्यक्ष जानकीराम साहले माइन्युट च्यात्नु, बैठक कोठाको कुर्सी तोडफोड गर्नु र होहल्ला गरि बैठक भाड्नेलगायतको कार्य गरिनु गलत रहेको बताउनुभयो ।
उहाँले बैैठक सुरु भएपछि सम्पूर्ण हरहिसाब सम्पूर्ण कार्यपालिका सदस्य तथा जनप्रतिनिधीहरुलाई उपलब्ध गराउने योजना रहेको भएपनि बैठक सुरु हुन नदिएर वडाध्यक्षहरुले गैरक्रियाकलाप गरेकोले कारवार्ही गरिने बताउनुभयो ।
