धनुषा, ०७७ असार १० गते ।
जनकपुरस्थित प्रादेशिक अस्पताल जनकपुरको इमरजेन्सी वार्डमा एक विरामीको छटपटिएर मृत्यु भएको रहस्य सार्वजानिक भएको छ । हंसपुर नगरपालिका वडा नं. ७ बस्ने असे सदाका १५ वर्षीय छोरा राजु सदाको प्रादेशिक अस्पताल जनकपुरमा चिकित्सकको लापरवाहीले सोमवार राति ३ बजे उपचार अभावमा छटपटिएर मृत्यु भएको पिडित परिवारको आरोप छ ।
मृतकका वुवा असे सदाका अनुसार छोरालाई इमरजेन्सी वार्डमा भर्ना गरिएको भएपनि चेकजाँच गरिएनन्, औषधी दिएनन् र राति छोरा छटपटिएर वेडमा भुँइमा लड्दा समेत चिकित्सकहरुले कुनै चासो नलिदा उपचार अभावमा मृत्यु भएको बताए ।
सोमवार ४ बजे जनकपुरको प्रादेशिक अस्पतालकै कोरोना विशेष अस्पतालबाट प्रादेशिक अस्पतालको इमरजेन्सी वार्डमा भर्ना गरिएको थियो । इमरजेन्सी वार्डमा भर्ना गरिएको करिव १० घण्टापछि सदाको मृत्यु भएको मृतकका काका विरेन्द्र सदाले बताए ।
भारतको अहमदावादबाट ८ दिन लगाएर पैदल यात्रा गर्दै सिमाबाट जेठ ३ गते गाउँ प्रवेश गरेका राजु सदालाई १७ दिन हंसपुर नगरपालिकाको नौवाखोर प्रसाहीस्थित क्वारेन्टाइनमा राखिएको थियो । क्वारेन्टाइनमा राखेपछि उनलाई झाडापखाला लागेको थियो । झाडापखाला लागेर कमजोर भएका उनलाई कोरोना भाइरस लागेको आंशकामा जनकपुरस्थित कोरोना विशेष अस्पतालमा भर्ना गराइएको थियो ।
३ दिन जनकपुरस्थित कोरोना विशेष अस्पतालमा राखिएको राजुको रिर्पोट निगेटिभ आएपछि सोमवार साँझ ४ बजे सुविधा सम्पन्न प्रादेशिक अस्पतालको इमरजेन्सी वार्डमा उपचारको लागि सिफट गराएको कोरोना अस्पताल धनुषाका संयोजक डा.जामुन सिंहले बताए ।
डा. सिंहका अनुसार राजु सदालाई आइसोलेशन वार्डमा भर्ना गरिदा समेत उनको स्वाव संकलन गरि रिर्पोटको लागि ल्यावमा पठाउँदा ७ दिन पछि रिर्पोट आउँदा निगेटिभ पाएकाले हामीले उपचारको लागि परिवारजनको उपस्थितीमा इमरजेन्सी वार्डमा भर्ना गरेको बताए ।
डा. सिंहका अनुसार राजु सदाको रगतको नमुना संकलन गरि टेष्ट गर्दा खरावी पाएको बताए । उनले विरामीको अवस्था नाजुक रहेको बारेमा आइसोलेशन वार्डमै रहेका वेला धनुषाका प्रमुख जिल्ला अधिकारी कोषहरि निरौला र सामाजिक विकास मन्त्रालयका सचिव डा. रामप्रसाद घिमिरेलगायतलाई जानकारी गराएको बताए ।
मृतक सदाको ब्रेन टयुमर भएको हुन सक्ने आशंका गरिएपनि उनको भने सिटि स्क्यान गरिएको छैनन् । १७ दिन क्वारेन्टाइन र १३ दिन आइसोलेशनमा बसेका युवाको उपचार अभावकै कारण मृत्यु भएको मृतकका काका विरेन्द्र सदाले दावि गरेका छन् । मृतकका कारण विरेन्द्र सदाका अनुसार राजुलाई उपचारको लागि आइसियुमा राख्नुपर्नेमा कुनै सुविधा नभएको इमरजेन्सी वार्डको वेडमा मात्रै राखेको दावि गरेका छन् ।
मृतक परिवारले अस्पतालबाट शव बुझेर सोमबार दिउँसो दाहसंस्कार गरि सकेका छन् ।
