धनुषाका प्रजिअमाथि मुद्दा

जनकपुरधाम ।
जिल्लामा शान्ति सुरक्षा कायम गराउने जिम्मा प्रमुख जिल्ला अधिकारी मातहत हुन्छ । तर धनुषाका प्रमुख जिल्ला अधिकारीमाथि नै मुददा पर्ने पछिल्लो समय बढ्दै गईरहेको पाइएको छ । धनुषामा प्रमुख जिल्ला अधिकारी भएर प्रदीपराज कणेल आएको १ वर्ष नै भएको छ ।
धनुषामा वि.स. २०७५ कार्तिक १९ गते प्रमुख जिल्ला अधिकारी भएर आएका थिए । प्रजिअ भएर आएको ८ महिनाकै अवधीमा २०७६ असारसम्ममै कणेलमाथि लगभग दुई सय मुद्दा परि सकेको छ । प्रजिअ कणेलमाथि सडक विवाद, शान्ति सुरक्षा कायम गराउने सम्बन्धि, जग्गा विवाद लगायतको प्रकृतिको मुद्दा अधिकांश परेको देखिन्छ ।
प्रजिअ कणेलका अनुसार यस्ता विवाद मिलाई दिनका लागि निवेदन दिन आउनेहरुको विपक्षीले नै अदालतमा रिट दायर गर्ने गरेका छन् । निवेदनकर्ताको पक्षमा कुनै निर्णय भएपछि प्रजिअलाई नै प्रतिवादी बनाएर अदालतमा रिट दायर गर्ने प्रवृति धनुषा जिल्लामा बढ्दै गईरहेको उनले बताए ।
अधिकांश रिट दायरकर्ताले प्रजिअले आफ्नो क्षेत्राधिकारको दुरुपयोग गर्ने गरेको गुनासो गर्ने गरेको पाइन्छ । कणेलले यस प्रकारको रिटले प्रजिअको कामकाजलाई प्रभावित गर्ने गरेको बताए । उनले भने‘ आफूले जिल्लाको अन्य काम हेर्ने कि यी रिटहरुको जवाब फर्काउने समय मिलाउनै गाह्रो हुने गरेको बताएका छन् ।’
उनले दिनहुँ विभिन्न कार्यक्रमहरुमा सहभागी हुनु पर्छ, कार्यालयको अन्य कामहरु समेत देख्नु पर्ने हुन्छ तर यस प्रकारको रिटहरुका कारण केही समय जवाब फर्काउनका लागि समेत निकाल्न परिरहेको बताए । आफूले यस्ता रिटहरुको जवाबमा आफ्नो कुनै किसिमको संलग्नता नरहेको र आफू दोषी नरहेको भन्दै अधिकांश रिटको जवाफ फर्काउने गरेको कणेलले बताए ।