जनकपुरधाम, ०७८ पुस २१ गते । धनुषालगायत तराईको भू–भागमा शितलहरको प्रभाव विद्यार्थीहरुको पढाई लेखाईमा परेको छ । शितलहरले गर्दा विद्यालयहरुमा विद्यार्थीहरुको उपस्थिती घटेको छ । केही दिनदेखि घाम नउदाएकाले गर्दा विद्यार्थीहरु कक्षाकोठामा अनुपस्थित हुन थालेको जनकपुरधाम उपमहानगरपालिका–२१ स्थित राजर्षि जनक माध्यमिक विद्यालय कुर्थाका प्रधानाध्यापक विरेन्द्रकुमार यादवले बताउनु भयो ।
निम्न मध्यवर्गीय समाजका विद्यार्थीहरु विद्यालयमा अध्ययनरत रहेको बताउँदै प्रधानाध्यापक यादवले विद्यार्थीहरु चप्पल र सामान्य सिउटरमा विद्यालय आउनुपर्ने बाध्यता रहेको बताउनुभयो । उहाँले गरिव, विपन्न घरपरिवारका विद्यार्थीहरुलाई न्यानो कपडा र पोषिलो खानेकुराको समेत अभावले गर्दा कक्षाकोठामा उपस्थिती घटेको बताउनुभयो ।
शितलहरको प्रभावले कक्षाकोठामा विद्यार्थीहरु अनुपस्थित हुन थालेको धनुषाको नगराईन नगरपालिका– ४ स्थित श्री आधारभुत विद्यालय हाँसपटटीका प्रधानाध्यापक अशोक साहले बताउनुभयो । उहाँले विद्यार्थीहरुको कक्षाकोठामा अनुपस्थिती दर बढेपछि हामीलाई समेत कक्षाकोठाको नियमित पढाई अगाडी बढाउन समस्या हुने गरेको बताउनु भयो ।
नगराइन नगरपालिकाको शिक्षा शाखाले पुस १९ गतेदेखि पुस २३ गतेसम्म नगरपालिका भित्रको सम्पूर्ण सरकारी तथा संस्थागत विद्यालयमा विदा दिएको घोषणा गरेको छ । नियमित रुपमा कक्षाकोठामा विद्यार्थी घटनुको साथै स्वास्थ्यमा विद्यार्थीहरुको स्वास्थ्यमा पर्न सक्ने खतरालाई मध्यनजर गर्दै नगराईन नगरपालिकाले पाँच दिनका लागि विद्यालयको पठनपाठन औपचारिक रुपमा बन्द गरेको नगराइन नगरपालिकाका मेयर परमेश्वर यादवले बताउनु भयो ।
क्षिरेश्वरनाथ नगरपालिकाको पुस १९ गते पालिकामा विद्यालयका प्रधानाध्यापकहरुको बसेको बैठकबाट अत्यधिक चिसो बढेकाले बालवालिकाको स्वास्थ्यमा पर्न सक्ने खतरालाई मध्यनजर गर्दै पुस २० गतेखि पुस २५ गतेसम्म क्षिरेश्वरनाथ नगरपालिका भित्रको सम्पूर्ण विद्यालय बन्द गर्ने निर्णय भएको निमित्त प्रशासकिय अधिकृत प्रमोद घिमिरेले बताउनु भयो ।
लक्ष्मीनियाँ गाउँपालिकाले जाडो बढेको भन्दै पुस २० गतेदेखि अर्को सुचना नहुञ्चेल अनिश्चितकालका लागि विद्यालयहरु बन्द गरेको छ । लक्ष्मीनियाँ गाउँपालिकाका प्रमुख प्रशासकिय अधिकृत हरिशंकर यादवले एक सूचना जारी गर्दै गाउँपालिका भित्र रहेका सरकारी तथा संस्थागत विद्यालयहरु बन्द गर्ने निर्णय भएको बताउनु भयो ।
दिपेन्द्रप्रसाद सिंह
