कमला नदीमा अवैध रुपमा जारी उत्खनन् तत्काल रोक्नु पर्ने माग गरिएको छ । ‘कमला नदी बचाउमे आर–पार सहज कनेक्टिविटी’ विषयक विचार गोष्ठीका वक्ताहरुले सो माग गरेका हुन् । जिल्ला समन्वय समिति धनुषाको सभाकक्षमा शनिबार आयोजित सो गोष्ठीमा अवैध रुपमा नदी जन्य पदार्थको उत्खनन हुनुमा स्थानीय सरकार नै दोषी रहेको आरोप समेत वक्ताहरुले लगाए । कार्यक्रममा कमला बचाउ अभियानका संयोजक बिक्रम यादवले अवैध उत्खनन गर्नेहरुमाथि कडा कारवाही गर्नु पर्ने माग गरे ।

अवैध उत्खननको कारण केही निहित व्यक्तिहरुलाई लाभ भएको देखिए दीर्घकालीन रुपमा यसको नकारात्मक प्रभाव पर्ने भएकोले स्थानीय तहदेखि संघ सरकारका निकायहरु संवेदनशील हुनु पर्ने आवश्यकता औंल्याए । नदीजन्य पदार्थको दोहनकै कारण स्थानीय वासिन्दाहरुले बाढी र कटानको समस्या भोग्नु परिरहेको गुनासो समेत उनले पोखे । कार्यक्रममा गणेशमान चारनाथ नगरपालिकाकी उपमेयर मीना यादवले कमला नदी अभियानका कार्यक्रमहरु जिल्लाको सदरमुकाम वा अन्य ठाउँमा आयोजना गर्नाले कमला नदी बचाउ अभियान÷कार्यक्रम सफल नहुने बताइन् ।

कार्यक्रमलाई सफलता पूर्वक अगाडि बढाउन सम्बन्धित स्थानीय तहको सम्बन्धित वडामा कार्यक्रम आयोजना गर्नु पर्ने धारणा राख्दै कमला नदी नियन्त्रणमा आफू तत्पर रहेको एवंम् समय समयमा अनुगमन गरिरहेको उनले जानकारी दिइन् । अनुगमनको क्रममा आफूलाई पनि उत्खनन कार्यमा संलग्न ठकेदारहरुबाट धाक धम्की आएको उल्लेख गर्दै उनले यसप्रति अझै कडाइका साथ अगाडि बढ्ने प्रतिवद्धता व्यक्त गरिन् ।

गोष्ठीमा वक्ताहरुले कमला नदी तटमा वृह्त वृक्षरोपण कार्यक्रम गर्नुपर्ने र त्यसको संरक्षण सम्वद्र्धन एवं नदीलाई जोगाउनको लागि स्थानीय निकाय, प्रदेश सरकार, संघ, संस्था लगायत गाउँ टोलबाट स्थानीय समाजको जन सहभागिता समेत हुनुपर्ने धारणा राखेका थिए । कमला बचाउ अभियानको आयोजनामा भएको सो गोष्ठीमा कमला नदी नियन्त्रण आयोजनाका प्रमुख विष्णुदेव यादव ,क्लोथ बैंकका प्रमुख राजीव झा,जिल्ला प्रहरी कार्यालय धनुषाका प्रतिनिधि,जिल्ला प्रशासन कार्यालय धनुषाका प्रतिनिधिको सहभागिता रहेको थियो ।