सलार्ही,०७८ माघ २८ गते । कामाख्या परिवार नेपाल जनकपुरले सलार्हीको बागमती नगरपालिका वडा नं ८ (सोल्टी बजार) का ७५ विपन्न घरपरिवारलाई राहतस्वरूप खाद्यान्न सामाग्री सहयोग गरेको छ । प्रति परिवार एक बोरा चामल, बाक्लो न्यानो कम्बल तथा एक–एक पोका बिस्कुट वितरण गरिएको कामाख्या परिवारले जनाएको छ ।
कामाख्या परिवार नेपाल केन्द्रीय कार्यालय जनकपुर तथा कामाख्या परिवार नेपाल सर्लाही शाखाको संयुक्त सहकार्यमा जन चेतना मूलक भव्य कार्यक्रमको आयोजना गरिएको थियो । संचेतना समारोहमा केन्द्रीय अध्यक्ष श्री विभास लाभले आध्यात्मिक दर्शन तथा धर्मको तात्विक मूल्यद्वारा निर्दिष्ट समाजले मात्र स्थायी समृद्धि सुख र शान्ति प्राप्त गर्न सक्ने बताउनुभयो । उहाँले वर्तमान युग – जीवनमा प्रत्येक आयाम राजनीति अर्थसामाजिक अवस्था, धर्म, संस्कृति आदिमा देखिएका अनिष्टकारी विकृतिहरु देखा परेका छन् र यिनको सुव्यवस्थापन धर्म द्वारा मात्रै संभव भएको हुँदा मानवीय चेतनामा धार्मिकता ’लोक–मंगलको एक मात्र सुत्र हुने बताउनुभयो ।
कार्यक्रममा सर्लाहीका प्रमुख जिल्ला अधिकारी थानेश्वर गौतम र सिडियोकी धर्मपत्नी ज्ञानु गौतम, जनपथका प्रहरी उपरिक्षक कृष्ण प्रसाई र उहाँकी धर्मपत्नी भावना प्रसाई, स–शस्त्र प्रहरी उपरिक्षक भरत खानिया र उहाँकी धर्मपत्नी प्रगती खानिया बागमती नगरपालिकाका समाजसेवी दीपक राणा भाट, जवाहर कुशवाहा, पशुपति कार्की कामाख्या परिवार नेपाल केन्द्रीय कार्यालयका सचिव श्रीमती ललिता लाभको उपस्थिति थियो ।
समारोहका प्रमुख अतिथी प्र.जि.अ थानेश्वर गौतमले ’कामाख्या परिवार नेपाल सर्वे भवन्तु सुखिनः र वसुधैव कुटुम्बकम मा अटल आस्था राख्दछ र धर्ममा आधारित विश्व समाजको निर्माणमा प्रतिवद्ध छ’, भन्ने विचार व्यक्त गर्नु भएको थियो । कार्यक्रमको अध्यक्षता कामाख्या परिवार नेपाल सर्लाहीका अध्यक्ष श्री राकेश प्रसाद चौधरीले गर्नु भएको थियो भने उदघोषण कृष्ण पुलामीले गर्नु भएको थियो ।
यो विषयमा आफ्नो प्रतिक्रिया दिनुहोस् !