सप्तरी, ०७६ चैत्र ४ गते ।
सप्तरीको छिन्नमस्ता गाउँपालिका–७ मा मङ्सिर १४ गते सम्पन्न उपनिर्वाचनका उम्मेदवारले साढे तीन महिना बिते पनि खर्च विवरण बुझाएका छैनन् ।
निर्वाचन आयोग नियमावली २०७३ को दफा १४ बमोजिम निर्वाचनको अन्तिम परिणाम प्रकाशित भएको मितिले ३० दिनभित्र अनुसूची ५ को ढाँचामा खर्चको विवरण पेश गर्नु पर्ने हुन्छ । जिल्ला निर्वाचन कार्यालय सप्तरीका अनुसार वडा अध्यक्षमा बिजयी उम्मेदवार राजपा नेपालकी प्रमिलादेबी यादवले मात्र निर्वाचन खर्चको विवरण मङ्सिर १९ गते बुझाउनु भएको छ । कार्यालयका नायव सुब्बा नबिन यादवका अनुसार वडा अध्यक्ष यादवले खर्च विवरण बुझाए पनि बील भरपाई बुझाउनु भएको छैन् ।
निर्वाचन आयोग ऐन २०७३ को दफा २५ को १ मा राजनीतिक दल वा उम्मेदवारले निर्वाचनको अन्तिम परिणाम प्रकाशित भएको मितिले ३० दिनभित्र आयोगले तोकेको ढाँचामा खर्चको विल भरपाई सहित निर्वाचन खर्चको विवरण पेश गर्नुपर्ने व्यवस्था छ ।
तोकिएको अवधिमा खर्च विवरण पेश नगर्ने राजनीतिक दल वा उम्मेदवारलाई निजले गरेको निर्वाचन खर्च वा आयोगद्वारा निर्धारित खर्चको हदमध्ये जुन बढी हुन्छ सोही बराबरको रकम जरिवाना गर्न सक्ने व्यवस्था निर्वाचन आयोग ऐनको दफा २६ को १ मा छ । दफा २६ को २ मा निर्वाचन खर्चको विवरण पेश नगरेमा वा अस्वभाविक वा निर्वाचनको स्वच्छतामा प्रतिकूल हुने गरी खर्च गरेमा खर्च बराबरको रकम वा पाँच लाख रुपैयाँमध्ये जुन बढी हुन्छ सो बराबरको रकम जरिवाना गर्न सक्ने उल्लेख छ ।
उप निर्वाचनमा नेकपा, नेपाली कांग्रेस, राजपा नेपाल, राष्ट्रिय प्रजातन्त्र पार्टी, जनमत पार्टी र २ स्वतन्त्र उम्मेवारहरूले प्रतिस्पर्धा गरेका थिए । वडा अध्यक्षको उपनिर्वाचनमा ७ सय ५७ पुरुष र ६ सय ४६ महिला मतदाता रहेकोमा ५ सय ५३ पुरुष र ५ सय ६१ महिलाले मतदान गरेका थिए ।
साभार : इन्सेक अनलाइन
यो विषयमा आफ्नो प्रतिक्रिया दिनुहोस् !